سياسة التتار....فرررررررق تسد

كنا وصلنا لحد فيييييين؟






اه لحد مفزت بالمعركة المصيرية بفضل الخطط التحيوية





الحقيقة يا جماعة من ساعة مطلعت الصندوق و كسرت القفل تقدروا تقولوا ان حياتي ملأها الهدوء.. الي حد ما





مفيش كدة الا حبة نكد علي الماشي لما يتشرف بيتنا باستضافة هولاكو التتري(و بصراحة يعني نستاهل حد يستضيف ملك التتار في بيته ..ايييه دنيا)





ده غير بنات هولاكو و السم اللي بيكبوه كب في بيتنا الواحدة من دول كل متروح عندها تسمع صوت و جوزها و الشبب بيطرقع عليه و ييجوا عندنا عايزين يخلوا اخوهم سي السيد و كل مسمعهم بيتكلموا من ورايا اللي تقوله اديها باللي في رجلك و اللي تقوله اكسر للبت ضلع يطلعها 24 و اكفي القدرة علي فمها يدلدق الفول منها و اني ممكن اطلع شبه والدتي و اطفشه من البيت و استولي علي العيال..صحيح الكلام ده معدش بيدي نفس التأثير التخريبي بتاع زمان بس برده مفيش مانع انهم يلعبوا الديناصور اللي في عبه شوية





عموما اللي تكتكت لهولاكو تتكتك لعياله(اسفة اصدي لحربياته)




ليكم يوم برده بكرة تشوفه




المهم طبعا عايزين تعرفوا سبب العنوان اللي فوق و ايه علاقته بالكلام ده




اصبروا بس خليني احكيلكم



بصراحة انا من اول جوازي قررت اني اعيش لوحدي تجنبا للمشاكل يعني مراتت اخوات جوزي انا مليش علاقة بيهم نهائي غير اللقاءات العائلية السريعة و المواسم و الاعياد مش اكتر من كدة رغم ان فيهم اللي في مستوايا الاجتماعي و الفكري الا انهم سهنات كبار هم كمان و تجنبا للقيل و القال قررت الابتعاد و اتقاء شر المعرفة(عاقلة انا مش كدة)...ده غير ان كل يوم تسمع ان واحدة فيهم بتتكلم عليا و بتسب فيا و في مامتي ..بسمع من مين..من هولاكو طبعا و حربياته...امال اصل دول يخدموا بعنيهم و كل شوية ييجوا ينقلوا اسرارهم لينا و بالتأكيد بينقلوا اسرارنا ليهم..طيب بيعرفوا منين الاسرار؟؟ ربنا يخلي عيال هولاكو كل عطسة في بيتنا ننوس عين امه يروح يقولها علي اللي حصل ..كذلك اخوات الننوس نسانيس زيه برده..


طيب حتقولولي مش يمكن بيكدبوا عليكي ؟؟ حقولكم مهم لو كانوا قالولي مكنتش صدقت لكن اللي بيحصل اني بسمع طراطيش كلام من كلامهم مع جوزي


علي سبيل المثال في يوم دخلت اعمل الشاي لهولاكو و بنته و الكبيرة وانا طالعة بالصينية سمعتها بتقول لننوسها:



مش اخوك و مراته بيقوله عليك انت و مراتك ديوك شركسية نافخين صدرهم و فاردين ريشهم و رافعين مناخيركم في السما و ان شاء الله حيجي اليوم اللي يكسرهالكم فيها




خليتني رجعت بصنية الشاي و دخلت اوضتي ابص علي نفسي .. مالي يعني ده انا حتى رفيعة خالص و مناخير في مكانها مش مرفوعة يمكن عندي ريش و انا مش واخدة بالي؟؟؟؟ اااااااااه ..ايوة ايوة هي تتكلم عن الروب الجديد اللي جابتهولي ماما..بس ده فيه فرو مش ريش يا اخوانا اووووووف دي شكلها ناس جاهلة اوي




رجعت تاني ادخل بصنية الشاي سمعتها بتعيط (اصدي بتمثل العياط و شلال دموع التماسيح شغال) اهي اهي شوفت يا بني اخوك اقوله اديني فلوس معيش فلوس ارمم سقف البيت اللي حيقع علينا ميعبرنيش و يقولي يا امي معيش فلوس و يروح يشتري للمقروصة علي قلبها حلق دهب جديد.. اهيء اهيء يستخسر في امه الفلوس و يجيب للمقروصة الدهب


مين المقروصة دي؟؟؟؟؟ مرات ابنها طبعا



و طبعا ذو القلب الحونين حاب يطلعلها فلوس بس انا دخلت عليهم زي القضاء المستعجل فرجع الفلوس في جيبه تاني علشان معرفش وقالها بسيم كدة من تحت لتحت: ان شاء الله حبقي اجيلك بكرة يا ماما علشان اشوف موضوع اخويا ده


اخخخخخ موضوع اخوك يا كداب ماشي يا محروس ليك يوم ابقي وريني حتروحلها ازاي؟؟؟



-------------------------------


يعني فكرتي من الاخر عن كل مراتت اخواته و اخواته نفسهم زفتتتت و اطران







بس يعني لازم نودهم من باب صلة الرحم برده علي الاقل فمن وقت للتاني كدة اعزمهم علي شاي ولا ييجيوا يقعدوا يتفرجوا معانا علي ماتش للاهلي و اهو الرجالة يتفرجوا والستات تخدم عليهم


المهم يا اخوانا في يوم من ذات الايام اخوه الكبير جه البيت علشان ماتش مهم بين الاهلي و الزمالك و انتوا عارفين اليوم اللي زي ده في البيت بيبقي عامل ازاي؟؟؟؟



حااااااااااااااااالة طواااااااريء قصوي محدش يتكلم و لا يفتح بؤه و كله يقول اهليييييي اهلييييييييي اوه اوه غير كدة مفيش


و المنزل يتحول الي اللون الاحمر ويا ويله يا سواد ليله اللي يلبس حاجة فيها لو خط صغير ابيض يروح في داهية و ميخلصش من التأليس و طولة اللسان عليه


حتي الشاي لازم يبقي احمر الشاي باللبن ممنوع في اليوم ده (طبعا لأن اللبن ابيض) و الجبنه البيضا لو شافها ممكن يحدفها في وشي بجبله الجبنة الفلامنكو ..لأ متفهموش غلط هو مبياكلهاش هو بيحطها قدامه علشان يتفرج علي اللون الاحمر



تخيلوا بقي طول اليوم عمالة اطلع كل حاجة حمرا في البيت علشان اعصابه تهدي ولو اني اسمع ان موضوع اللون الاحمر ده بينرفز الا ان جوزي العكس الاحمر ده بقي بيهدي اعصابه


اول مأخوه و مراته جم استريحت و قعدت جنبهم ابصلكم يا خوانا في وشهم عاملين زي ميكون كل واحد واخدله شبشبن قبل النزول الراجل وشه احمر (من كبت الغضب) و البت وشها احمر (من كبت الدموع ) و يا عيني الدموع واقفة علي عينها عايزة تنزل و هي موقفاها بغض النظر عن شكلهم ده اسعد محروس (ايوة اسعده مش وشوشهم حمرا يبقوا تبعنا) الا ان الانسانة اللي جواية ابتدت تحركني و ارجعها



الانسانة : قومي خدي البنت علي جنب شوفيها مالها دي شكلها تعبانة اوي
كعبولة : لألأ ثم دي بتشتم فيا و بتقول عليا ديك شركسي
الانسانة : يا بنتي حرام دي شكلها يصعب علي الكافر
كعبول : كافر مين ؟ ده حتي الكافر في بعض الاحيان بيبقي عنده اخلاق لكن دول اعوذ بالله
الانسانة : ربنا يخليكي يا كعبولة شوفيها حرام و الله يعني الستات هم ليهم مين غير بعضهم يواسيهم
كعبولة : لأ يا ماما دي مش ست دي ست اشهر ..علشان تعرف تشتم فيا كويس
الانسانة : اخس عليكي يا وحشة فين كعبولة ام قلب طيب و حنين و ابيض زي اللبن الحليب
كعبولة : مهم سودوه خلاص من كتر مبيكبوا فيه تراب و طين ..ثم متجبيش سيرة اللبن و الابيض دلوقتي بدل مجوزي يطين عيشتنا
الانسانة : بصي علشان خاطر ربنا مش خاطر اي حد تاني ..مش انتي لما كنت بتزعلي من جوزك تقعدي تعيطي و تقولي يا للي مليش حد في الدنيا دي ياني..شكلها هي كمان معندهاش حد تشكليه خليكي الصدر الحنين و الام الرؤوم و اعملي الخير و ارميه البحر


يا اخوانا الدمعة كانت حتفر من عيني فاضطريت اضطرار اني اسحبها علي اوضتي و هنيالك يا فاعل الخير


دخلتها اوضتي و قلتلها سبينا احنا من صوتهم العالي و خلينا ناخد الشاي في اوضتي علي رواق

اول مدخلتها اوضتي و قفلت الباب : قلتلها مالك يا بنتي شكلك معيطة

دورت وشها وقالتلي : لأ ابدا بس تعبانة شوية من دوشة العيال

في سري : عيال ايه ؟؟ الشبشب اللي عطاله بيه شكله جامد اوي علشان يخرسك بالشكل ده

قدامها: مالك يا بنتي شكلك مش طبيعي فيه ايه قوليلي انا زي اختك

فجأة لقيتها انفجرت في العياط و رمت نفسها في حضني و لقيت نفسي عمالة اطبطب عليها و اقولها بس يا حبيبتي اهدي شوية مش كدة فيه ايه بس ليه ده كله اهدي كدة و فهميني

كلمتني وسط دموعها وقاتلي: عايزة اطلق


ايه يا نهاري طلاق ..يا دي ستات الايام دي .اسهل حاجة عندهم يفكروا في الطلاق ..محدش يا اخوانا بيفكر في عمار البيوت زيي انا و تحية لاحول ولا قوة الابالله


تمالكت اعصابي و رديت عليها: طلاق ايه يا بنتي كدة صلي علي رسول الله ..و استعيذي بالله من الشيطان الرجيم..ده انتوا بينكم عيال يعني يتبهدلوا لو سبتوا بعض..فيه حد يدور علي خراب بيته؟؟ استهدي كدة بالله و كل مشكلة و ليها الف حل


و هي مهرية من العياط: الا مشكلتي خلااااااااص انا تعبت يا ناس معتدش قادرة استحمل

انا : لا بنتي مش كدة استعيذي بالله من الشيطان الرجيم وواحدة واحدة كدة فهميني..ايه اللي حصل لده كله

هي : انا عارفة انك بتكرهيني بس انا مش لاقية حد اكلمه


مين ..؟ فين..؟ ايه؟؟؟

مين اللي بيكره التاني يا حاجة ثم هو انا اللي كنت بشتم فيكي و بقول عليكي ديك شركسي؟؟

تمالك اعصابي خااااااااااالص و رديت عليها بهدوء: و اكرهك ليه يا بنتي هو انا بيبني و بينك ايه اصلا علشان اكرهك

هي بتنهنه : و انا اش عرفني..حماتي هي اللي جت قالت لجوزي متروحش عند اخوك و مراته ..دول متأنعرين و حاطين مناخيرهم في السما و اخريتها رايح جايبلها روب بالريش بالشيء الفولاني علشان تتفخ عليكم زي الديك الشركسي و تمشي تقول يا ارض اتهدي ما عليكي اديي


باااااااااااااااااااااااااااس ... استووووووووووووووووووووووووب


يا نهااااااااااري


قولولي سمعتوا الكلام ده فين قبل كدة..رنين الكلام اختلف يا اخوانا

صدق من قال ما شتمك الا اللي بلغلك


اهدي كدة يا كعبولة و استعيذي بالله من الشيطان الرجيم ولا كأنك سمعتي حاجة


البت كملت من وسط العياط : و انا اصلا معملتكيش حاجة و بتقولي عليت منفوخة عليكي وواخدة جنب مع اني و الله مافيش بيني و بينك اي شيء ..حتي اول متجوزتوا قلت اكيد حتبقي صاحبتي لأننا من سن واحد ومستوي فكري واحد ..لكن فوجئت انك بتقولي عليا الكلام ده يبقي بتكرهيني ولا لأ؟؟؟؟

انا : لأ طبعا..يبقي فيه واحد موقع بينا

البت يا عيني انصدمت لدرجة ان دموعها اتجمدت في عنيها و بصتلي بازبهلال و قاتلي: مش فاهمة اصدك ايه؟


حكيلتها علي اللي سمعته ووصلات الشتايم اللي بتتقال فيها هي و جوزها عندنا و كل الكلام الفارغ اللي اتملي بيه دماغنا

البت فضلت مزبهلة لحد اخر كلمة قلتها و اول مخلصت كلامي انفجرت في الضحك

هاهاهاه..نيهاهاهاها

ايه ديه مالها ناوية تقلب عفريت ولا ايه؟؟؟؟

خليتني انا بقي اللي بصتلها بازبهلال مالك يا بنتي فيكي ايه؟؟


قاتلي : بقي هو ده الكلام اللي بيتقال عندك..طيب خدي عندك بقي


اولا : كل يومين تيجي حماتي البيت عندنا تعيط ..اهيء اهيء الحقوا اخوكم محروس مراته حتخرب بيته..كل يوم هات هات هات لحد ما الواد فلس و بقي كل شوية ييجي يستلف مني و انا معيش خلاص و لدرجة انه بياخد الفلوس اللي شايلاها لأكل البيت و اقوله يا حبيبي دي فلوس الاكل فيقولي لأ لحسن مراتي تخرب بيتي هاتي الفلوس
يقوم جوزي يطلع اللي فيه النصيب و يديلهولها..ده وصل بيه انه مرة طلعلها من الاكل اللي في التلاجة لأنه مكنش معاه فلوس في جيبه


و لما اقوله محتاجة حاجة يقولي معيش


حتي يوم عيد ميلادي مجبليش حتي سندوتش فول و يقولي كل سنة و انتي طيبة. بابا و ماما جولي و جابولي حلق هدية يقولهم ده بمناسبة ايه؟؟ عيد الاضحي


و بعدها بيومين امه جت تطالبه بفلوس تاني مكنش معاه فلوس مصمم ياخد الحلق اللي جبهولي بابا و يبيعه و يديها فلوسه و لما رفضت قلب عليا و يقولي انتي مش حاسة امي غلبانة اد ايه ده السقف حيقع عليهم

صممت و قتله لأ يعني هي تروح تتجوز و تصرف فلوسها علي جوزها و ابنها متعوس و انا ابيع دهبي مش بايعة و اخبط دماغك في الحيط


و اتاريها ياختي في الاخر بتحوش فلوس علشان تطلع شارم

انا بازبهلال : شارم!!!!!!!!!!!!! ده من يوم متجوزت متعوس نسيت شكل المصايف ايه؟؟


هي : بس يا ستي لما سمعت انها مسافرة شارم هي و المحروس بتعاها الدم طلع في نفوخي..ودخلت قلتله يعني انت تخرب بيتنا و نقعد في بيتنا منغير فلوس و الهانم في الاخر تروح تتفسح بيهم ده احنا نسينا الفسح بسببها..فاتكسف مني و ملقاش حاجة يعملها الا انه يبهدلني لأنه ملقاش الاكل جاهز لما رجع من البيت علشان يداري بيها علي الخيبة اللي احنا فيها و في الاخر يقولي امي و هي حرة و انا حر ده انا ابيعك هدومك علشانها و لو مش عاجبك الباب يفوت جمل و نزلني غصب عني علشان اجي عندكم و يضمن انه لما ينزل مش حأكلم لا بابا و لا ماما و احكيلهم علي اللي حصل


بصراحة الصدمة كانت اكبر مني و منها ..احنا كارهين بعض منغير سبب معروف..و الهانم منشار علي الكل طالع واكل نازل واكل نايم واكل
و احنا عاملين زي الطرش في الزفة و اجوازنا نفسهم طرش


لا هم فاهمين ولا عارفين اللي بيحصل و كل واحد شايل من التاني علي اساس انه سايب مراته تتحكم فيه


حسبنا الله و نعم الوكيل...انا مشوفتش ولا حشوف ناس بالشكل ده


علي بال مفقت من الصدمة قلتلها بصي يا بنتي


احنا مش لازم نعرف جوازنا اللي احنا عرفناه ده...اولا حيكدبونا..ثانيا حنطلع احنا الوحشين وهم الكويسين اردمي علي كل ده ولا كأننا عرفنا حاجة ده غير ان في احسن الاحوال لو جوازنا صدقونا يبقي هولاكو و اعوانه حيركزوا كل جهودهم في انهم يحطمونا و يطلقونا من بعض


لأ الوضع كدة احسن هي بتوقع بين الاخوات علشان تستفيد منهم فمش فاضيالنا


هي : يا سلام يعني نسيب حنفية الاستغلال دي شغال عمال علي بطال

انا : لأ ابدا بس لازم العقل و الحكمة و التصرف في الحاجات دي..و علي رأي المثل العقل زينة في الفترينة..بصي سيبي الموضوع ده عليا..حبعت مشكلتنا علي الحاجة تحية و اخليها تحطلنا خطة جهنمية

هي : مين الحاجة تحية دي؟؟؟ انتي بتلجأي للدجالين دول ياي انا مكنتش فاكراكي كدة

انا : دجالين ايه يا بنتي...دي صاحبتي في الشغل ..بس ليها في حبكة الخطط الجهنمية للقضاء علي الحمواتية الانوية..و متنسيش احنا مش حنحارب حماتنا بس دي معاها حربياتها الصغيرة مهم كانوا حاضرين الكلام ده كله معني كدة انهم مخططين معاها و مش بعيد يكونوا بيقسموا فلوسنا بالنص يعني جبهة حربية كاملة قدامنا

هي بتفكر و بتهرش في دماغها : عندك حق..بس ..بس...


انا : مبسش ولا كأنك عرفتي حاجة زي مبقولك خلينا نهدي الاول من الصدمة و بعدين نقرر حنعمل ايه معاهم..بس اهم حاجة متخسريش جوزك علشان ميستفردوش بيه و بيكي


هي رجعت تكمل عياط: يعني حعمل ايه يعني في اللي احنا فيه ده؟


انا بطبب عليها : اقولك انا
.................

ايه عايزين كله كدة مرة واحدة اصبروا علي رزقكم

المرة الجاية ان شاء الله انا قلت بس ارجع بشوية كلام مهم بعد هذا الغياب الطويييييييييييييييييييل جدا

في انتظار المرة القادمة علشان تعرفوا الخطط المضادة للطائرات ..اسفة (اصدي الحموات الفاتنات)

سلااااااااااااااااااام

كيدهن؟؟؟؟؟؟.......اتدرون الي اين يمكن ان يأخذهن؟؟؟

كنا و قفنا لحد فييييييييين؟

اه

لحد الخطة التحيوية الآنوية النووية

طبعا عايزين تعرفوا افكرها النيرة في مصالحة جوزي

شوفوا

هي قاتلي يا كعبولة يا حبيبتي لو كل ست سابت مشاعرها تشتغل لوحدها مش حتحتاج نصايح
سألتها : يعني ايه؟
تحية : يعني انتي زعلانة علشان هو حيطلقك او لأنه قال كدة بس نكدك عليه و اسلوبك معاه بيقوله انك زعلانة علشان كرامتك و يولع هو اما عن الراجل نفسه فهو عنده نرجسية متفحلة لو استغلتيها لصالحك تبقي ملكتي جوزك
كعبولة : مدام لغة عربية ممكن تكلميني بالعامية لأني بعيد عنك يعني مش فاهمة حاجة
تحية : بصي يا ستي.. الرجالة دول ميفرقوش كتير عن الاطفال يعني تدلعيه تشخلعيه تهشتكيه
كعبولة : اهشتكه يا ختي كميلة و ده من ايه ان شاء الله؟؟
تحية : بصي الرجالة بالذات اللي دلوعة ماما زي جوزك و رابطة حبل في رقبته يبقي اكسبيه في صفك احسن و امسكي انتي الحبل بدل متمسكه هي و تنكد عيشتك
كعبولة : برده مش فاهمة يعني اعمل ايه ادخل البيت ولا كأن في حاجة و احنا اصلا مش طايقين بعض ..لأ طبعا مينفعش
تحية : لأ انتي حتعملي اللي احسن من كدة
كعبولة : ايه ؟
تحية : انتي حتمسكي صندوق مشاعرك و تكسري القفل المصدي اللي عليه و تطلعي اللي جواه
بصراحة معرفتش ارد عليها و اترسم علي وشي علامات الغباء المستحكم
تحية تاني : بصي يا كعبولة برغم كل اللي بيحصل ده بس جوزك و الله راجل طيب و انا متأكدة انك بتحبيه و كل اللي بيحصل ده زوبعة في فنجان مش اكتر
كعبولة : ييه رجعنا للعربية الفصحي
تحية ضاحكة : اصدي يعني شوية مشاكل خفافي كدة امال تعملي ايه بقي لو كان بيصبحك و بيمسيكي بعقلة و لا منعك عن اهلك و لا حابسك مبيوريكيش الشارع ..صدقيني اكسبيه وانتي اللي حتكسبي و تكيدي الاعادي
كعبولة : يعني اعمل ايه يعني ؟؟
تحية : زي مقلتلك طلعي مشاعرك بشكل طبيعي انتي متضايقة انه بيفكر في الطلاق و انتي متقدريش تعيشي منغيره قوليله الكلام ده حترضي نرجسيته و تكسبيه في صفك و يمكن يحس بيكي كمان و يبتدي يغير اسلوبه معاك ..بصي انا عارفة انك بتقولي انها خسرانة خسرانة و مفيش فايدة من الكلام ده بس ايه المانع انك تحاولي و اهي يا صابت يا اتنين عور
كعبولة : عور؟؟؟ ماشي ان شاء الله
تحية : حاجة اخيرة قبل منطلع عايزاكي تهتمي بنفسك شوية مينفعش الاهمال اللي انتي فيه ده
كعبولة : يعني هو انا..........
تحية مقاطعة : هششششششش ..حتقوليلي البيت و العيال و المسؤلية ..اوك..معاك بس برده الرجالة مبيبصوش لده كله كل اللي بيفكروا فيه يمتعوا عنيهم بواحدة حلوة و بس ويا حبذا لو كانت نسخة من هيفا ولا نانسي
كعبولة : ايه ده يا تحية..هيفا و نانسي؟؟؟ ده انتي اخلاقك فسدت و عرفتيهم منين ان شاء الله؟؟؟
تحية ضاحكة : من بطة ..اصل دول اكتر اتنين جوزها بيحب يتفرج عليهم في الدش و كانت بتشتكيلي منهم
كعبولة : اه صحيح مهو ده كمان حكايته حكاية ..ربنا يهدي سرهم
تحية و هي بتبص في ساعتها : يلا يا كعبولة مفضلش الا 5 دقايق ويبدأ الشغل
كعبولة : يلا بينا

*******************************

طبعا مقلكمش اليوم عدي بطول مش طبيعي وانا اصلا مش مركزة في حاجة و عمالة اسمع كلام تحية في دماغي زي اللي بيحفظ النشيد علشان يروح يسمعه للميس
و اتصلت بماما اقولها عدي خدي العيال بمايا علشان الحق اروح البيت اعدل من نفسي شوية و اهو تجربة يا صابت يا خابت
اخيرا جت الساعة 4:30 لميت حاجتي و طيرااااااان علي برة و اول مرجلي عتبت برة باب الشركة لقيت قبضة حديدية فولاذية اطبقت علي دراعي و فم وحش قرب من ودني بيقولي من تحت ضروسة : اقسم بالله لو متلميتي و جيتي معايا من سكات لتكوني طالق بالتلاتة و مخلكيش تشوفي ظفر حد من عيالك انتي فاهمة اتلمي كدة بهدوء و معايا علي العربية.

عن نفسي كنت عاملة زي اللي اتبنجت انا اصلا توقعت اني حلاقي مطوة في جنبي وواحد بيقولي طلع اللي في شنطتك يا جميل كونه طلع محروس يبقي الحمدلله ماشيها النهاردة سمعي يا بنتي اللي كنتي بتحفظيه من الصبح ..ها قلنا ايه ؟؟.. النرجسية المتفحلة..زوبعة في فنجان..الرجل طفل كبير.. امسكي الحبل و شدي انتي..يا صابت يا 3 عور ..محدش يقولي اتنين انا خليتهم تلاتة يعني هو حد شريكي؟؟؟ عجايب و الله..

************************

اول موصلنا البيت يا ناس و نزلت من العربية رجع طبق علي دراعي بايده تقولوش حهرب..و طلعنا السلم علي رجلنا و احنا علي الحال ده اصلا هو مفتحش بؤه بكلمة طول الطريق زي الحلة اللي بتمليها ماية و تحطيها تغلي علي النار و تفضل تغلي تغلي و مستنياكي ترفعي الغطا علشان تكمل غليتها في وشك و اكيد طبعا الغطا حيترفع لما نوصل البيت و انا انتهزتها فرصة علشان اكمل تسميع..صندوق المشاعر ..القفل المصدي.. اكسريه
اول مدخلنا من باب الشقة اترفع غطا الحلة و كادت ان تطير فقاقيع الغليان في وجهي الا انني كسرت القفل و فتحت الصندوق
كعبولة : كفاية بقي حرام عليك..كفاية ارجوك
محروس : هو انتي لسة سمعتي حاجة ده انا حوريكي يوم اسود من ارن الخروب
كعبولة : ارجوك حرام عليك ..انت ليه مصمم تجرح مشاعري.. حتي لو انت عايز تطلقني انا مقدرش استغني عنك
محروس مصدوم : انا...انا...
كعبولة : انت ايه؟؟ انت علي طول سايبني لوحدي في عز احتاجي ليك ..علي طول حارمني من حضنك الدافي
كعبولة في دماغها:(يخرب بيتك ايه حضنك الدافي ده انتي بتخرفي يا بنتي ولا ايه؟؟)
كعبولة تكمل و الدموع الحارة بدأت تنسكب من عينها : انت عارف اني مليش حد غيرك في الدنيا ابويا و معرفش عنه حاجة و امي فين و فين لما بشوفها..انا مليش غيرك..يعني علشان كدة بتذلني ..اهيء اهيء..حرام عليك و الله ربنا محيسيبك و خليك عارف انه يمهل ولا يهمل
كعبولة في دماغها تاني : ( يخرب بيت جنانك جبتي الدموع دي كمان منين؟؟؟ بقي كان كل ده جوه الصندوق)
محروس يا ناس اتلخم و اتلجم و مش عارف يتكلم و ابتدي يخرج الكلام منه بهدوء :يا كيكو منتي برده مش مقدرة تعبي و اللي انا فيه طول اليوم و بتحدفي بكلام ملوش لازمة

استنوا استنوا بيقول ايه ؟؟؟..حد يخبطني علي دماغي.. بيدلعني بيقولي يا كيكو؟؟؟..كيكو؟؟انت بتقول كيكو ؟؟؟ يبقي انت اللي قتلت بابايا آه يا بابايا

لأ لأ مش دي..بس ايه ده مش ممكن ياختي كميلة تيجماله كن و من..سمعتوا اغنية الكتكوت اللي بيقول : يا حلولي يا حلولي و ده ايه ده اللي بيحصلي ترارا تارارا

بس بس ايه مزيكة حسب الله اللي اشتغلت دي..سكر يا ناس سكر
محروس يكمل : ثم اللي زاد و غطي و شيطني اكتر و طلع الدم لنفوخي لما امك هددتني بانها حتاخدك هي و العيال..اهو ده اللي كان ناقص كمان واحدة ست تهدد محروس
كعبولة و هي بتمسح دموعها : منتا كمان كل شوية ترميني و تروح عند والدتك يعني كنت اعمل ايه يعني؟؟؟ثم انت عارف اني جبانة و مقدرش اقعد لوحدي يعني كنت اروح عند مين ان شاء الله؟؟
محروس برضا شديد و خجل اشد طبط عليا : طيب خلاص متزعليش مش حسيبك تاني لوحدك بس متدخليش والدتك بينا ..انا بقولك اهه..بدل مقلب عليكي تاني ماشي
كعبولة بفرحة عارمة : ماشي يا محروس و اوعدك اني مش حدخلها بينا تاني
محروس : ايه ده ؟؟ فين العيال و مايا؟؟
كعبولة : مانا ودتهم عند ماما
محروس : تاني ماما؟؟؟؟؟
كعبولة : انا قلت اعزمك علي الغدا برة النهاردة و تقضي يوم منغير دوشة العيال وتروق شوية و اصالحك
الراجل يا ناس انشكح نفخ صدره كدة زي الديك الشركسي ساعتها علي طول نطت في دماغي..النرجسية المتفحلة..لو ارضتيها حتكسبيه
حلو اوي نجحت الخطة رقم واحد عقبال رقم اتنين يارب
محروس : بس يعني الغدا برة حيكلفنا كتير
كعبولة : مش مهم يا حبيبي المهم انك ترضي عني
محروس : انا راضي بس بلاش تخريم ميزانية
كعبولة : طيب حناكل ايه دلوقتي؟؟ ده انا معملتش اكل
محروس : خلاص نروح نتغدي عند ماما

كنت حقع علي الارض يا ناس و اقوله لأ بلاش ابوس رجلك احنا ناقصين الا ان لمبة نورت في دماغي و عرفتني ان الزيارة دي هي المجال المفتوح لتنفيذ الخطة رقم 2 ياحلاوتك يا كعبولة يا بتاعت الخطط الاستراتيجية ..و اديها بقي مترحميهاش ولا تخليلها مش هي اللي بدأت والبادي اظلم

حطيت عيني في الارض و بمنتهي الادب و الهدوء : اللي تشوفه يا حبيبي
اخدني من دراعي و طيران علي برة ..طبعا مش رايح عن هولاكو..و قالي و احنا نازلين: اهي دي كعبولة اللي انا بحبها

استووووووووووووب بي ايه؟؟؟ بي ايه؟؟ بيحبها ياغمن عليا يا ناس كيكو و بيحبها في يوم واحد لأ لأ كدة كتير و الله..كل ده من صندوق المشاعر ده انا اشغله علي طول عرض متواصل..اه يا قلبي اهدي شوية, متقعش كدة من حبة حنية, فاكرنا حنرجع لأيامنا الهنية ,طيب خلينا نتفرج علي الايام الجاية

الحوووووووقنييي و كمان بقول شعر يا سلام يا تحية يا قوية الله يعمر بيتك و البيت اللي جنب بيتك و البيت اللي جنب جنب بيتك زي مدلتني علي طريق تعمير بيتي

يالا يا محروس بسرعة شوية لساني بياكلني عايزة اخلص الخطة التانية

وصلنا بيت هولاكو المهول و طبعا كانت واقفة علي الباب زي الغول

بتبصلي من فوق لتحت و بتقول : يا اهلا وسهلا ..بقي الهان السنيورة شالت الحنة من علي رجلها و جت بيتي
شوفتوا يا ناس الاحترام بتقول عليا هانم..ايوة كدة خلي المقامات محفوظة
رسمتلكوا ابتسامة عريضة علي وشي و بسرعة رميت نفسي في حضنها : وحشتيني يا ماما من زمان مشوفتكيش..تصدقي ليكي وحشة
محروس يا ناس انشكح زيادة و نزل علي ايد امه يبوسها مهو اصله لازم يقدم فروض الولاء و الطاعة

دخلت قعدت علي الفوتيه و انحعصت اوي و حطيت رجل علي رجل كمان و بسعادة مرسومة رسم علي وشي: ازيك يا ماما وكيف احوالك؟؟
هولاكو : الحمدلله بخير ..و ايه اللي جابك عندنا ان شاء الله؟؟
محروس : ايه يا ماما ..مكنتش عايزاها تيجي دي صممت تعزم نفسها علي الغدا عندك النهاردة علشان بتقول انك وحشاها اوي
انا في سري : انا قلت كدة يا كداب ..ماشي ماشي..غني علي دماغها
هولاكو : يا اهلا وسهلا ..طيب ادخل ساعد اختك بقي اصلها لسة جاية من الشغل و بتحضر الغدا و ميصحش اقوم المحروسة تساعدها دي برده اول زيارة بعد غياب
محروس: حاضر يا ماما
و طلع يجري علي المطبخ.. ماشي يا محروس بقي امك تقولك ادخل ساعد اختك تساعدها جري و انا لأ مماااااااشي بكرة تشوف

بصراحة لقيتها فرصة علشان استفرد بيها انفذ الخطة عليها بمزاج
لقيتها بتقولي : اصل محروسي حبيب قلبي ميقدرش يرفض لأمه طلب و بيحب يريحني اوي
كعبولة : انتي حتقوليلي يا ماما ..لأ و ايه ده ممتاز في شغل البيت و لا اجدعها ست بيت
هولاكو : يا سلام..ده مكنش بيعمل هنا الا حاجات بسيطة اوي في البيت
كعبولة : ايوة يا ماما بس الراجل بعد الجواز بيتغير بحكم المسؤليات عليه..تخيلي يا ماما امبارح قعد ساعة ينظف الحمام و في الاخر رشه بمعطر كل ده علشان عرف اني عايزة اخدلي شاور بالليل
هولاكو : ايه ؟؟ شاور؟؟
كعبولة : اه يا ماما يعني دوش
هولاكو : اه اه منا عارفة طبعا
كعبولة : ولا المكرونة بصلصة البولونيز اللي بيعملها ياي تجنن تهبل بصراحة هو مبيعرفش يعمل حاجة غيرها بس لما يحس اني تعبانة و مش قادة اطبخ يقولي ريحي يا حياتي و انا اطبخ النهاردة
هولاكو و الشرارة بطق من عينها : يا سلااااااام
كعبولة : اه يا ماما و غلاوتك عندي لا و ايه كمان؟
هولاكو : ايه؟
كعبولة : ده بقي بيمسك حلس يعمله كل حاجة من رضاعة لغيار ده حتي بقي بيعرف يحميه لوحده..ولا الباستا فلورا يا ماما اللي بيعملها حاجة تهوس ولا احسن شيف فيكي يا مصر
هولاكو يا ناس الدخان بقي طالع من ودنها و مناخيرها و الطور في مصارعة التيران و دخلت جري علي المطبخ و صوتها بقي جايب لميدان التحرير
--بقي سعادتك بتساعد الهانم في البيت..الله يرحم الرجالة..قلبوا حريم خلاص..بقي بترضع ابنك و بتغسلها الحمام..متهشتكها بالمرة و اتأكلها بايدك ..امشي اطلع برة بيتي انت لا ابني ولا اعرفك ..بررررررررررررررة

طلع محروس من المطبخ جررررررري و سحبني من دراعي و طيرااااااااان برة البيت

و اول مركبنا العربية
محروس : ايه اللي خلاكي تنسحبي من لسانك و تقولي اني بعمل حاجات في البيت
كعبولة ببراءة شديدة : يعني الحق عليا اني بعرفها انك ابن مطيع و سمعت كلامها و اتعلمت شغل البيت
محروس : يعني انتي مش عارفة ان ماما ست كبيرة و دماغها بتفوت اهي نسيت دلوقتي ان هي اللي قاتلي و حتقعد اكتر من اسبوع متكملمنيش بسببك
كعبولة : لو تحب اصالحكم علي بعض و....
محروس بتوسل : لأ الله يكرمك متدخليش في الموضوع انا حصالها بس ابعدي انتي عن الموضوع
كعبولة بادب و عينها في الارض : اللي تشوفه يا حبيبي
اما جوايا بقي بصراحة ظلت تترد اغاني النصر
بسم الله .الله اكبر بسم الله بسم الله.بسم الله .ادن و كبر بسم الله بسم الله
دولا مين و دولا مين..دولا كعبولة و تحيتين ..دولا مين و دولا دولا مين..دولا خططتهم الفتاكين
و اناااااااااااااا علي الربابة بغني


لألألأ كقاية عليكم كدة خلي اغاني النصر تترد في اركان قلبي شوية و روحوا شوفوا حاجة تعملوها علي بال مرجعلكم بالبوست الجديد
سلااااااااااااااااااام

عن الترابط الاسري و الحب من قبل جميع الاطراف

هااااااااا



ازيكم؟؟؟؟؟؟؟؟؟؟؟؟؟؟؟




طبعا حضراتكم اتعرفتوا علي المكتب المحترم و عايزين تعرفه كيف تصنع القرارات المصيرية في المطبخ النسائي المشترك لمجتمع حواء و كيفية ارتباط العمل بالمنزل و التأثير عليه





حقولكم بلاش استعجال كله حيجي واحدة واحدة




انا بس حبيت اعلق علي كل التعليقات علي الاستاذ زكي




ناس حبوه و ناس استغلسوه و حقول للاتنين بلااااااااااااش استعجال في بعض الاحيان اللي تفتكره موسي يطلع فرعون و في احيان اخري لا بيطلع موسي ولا فرعون فلنترك انطباعاتنا الشخصية جانبا علشان تسمعوا بقية الاحداث و تحكموا




انا دلوقتي حكلمكم عن الحب الاسري الواجب زراعته في القلوب من اجل استمرار السعادة الزوجية و الجنس البشري كله



احنا كنا وصلنا لحد فيييين؟؟؟

اه
وصلنا لحد ما الاستاذ محروس جوزي نكد عليا عيشتي كالعااااااادة و سابني و راح عند هولاكو

طبعا مش حدوش دماغكم بالتفاصيل ولا بالدش اللي اخده من باكينام هانم و انها هددته انه لو راح بات عند هولاكو تاني لا حيشوفني ولا حيشوف حلس و حلسة و رغم اني قلتلها ان كلامها بلا نتيجة الا اني فوجئت بالمحروس خاف و اترعب لا ميشوفش عياله تاني و قرر يتلم و يترزع جوة البيت بصراحة يا جماعة عمري مكنت اتخيل ان الراجل ده بيحب عياله اصلا ده كبيره يحب سندوتش شاورمة او نادي زي النادي الاهلي لكن بني آدمين صعب




عموما احنا قضينا يومين في هدوء شديد هدوء من النوع اللي تحس انه قبل العاصفة و ينبئ بزعابيب واعاصير قادمة يدخل البيت ميتكلمش ولا كلمة يفتح التليفزيون و ياخد حلس علي رجله يرضعه و هو بيتفرج (محدش يقولي يرضعه ازاي --ايه؟ مسمعتوش عن اختراع اسمه البيبرونة؟؟؟؟؟) و طبعا الولد ياخد الرضعة من هنا و ينااااااام من هنا ياخده بهدوء يحطه في سريره و يرجع يكمل فرجة



محدش يسألني علي ايه؟؟؟



الراجل ده مبيفهمش الا في 3 حاجات بس في التليفزيون



الكورة و الاهلي و الزمالك



غير كدة ميييييح



حد حيقولي هو بيفرج علي ايه كل ده مهو مستحيل كل ده كورة



حقولكم طبعا ثم مش بقولكم هو مبتكلمش و هو بيتفرج و ده يأكد انه مش بيتفرج علي ماتش كورة و الا كان هبد و رزع في البيت كله و سب للحكم و اللعبية و المدربين بالمشاهدين اصل هي دي طقوسه اثناء الفرجة علي ماتشات الكورة



و حقيقي انا معرفش بيتفرج علي ايه؟



مرة ابص الاقيه بيتفرج علي برامج طبخ و مرة بيتفرج علي برامج اطفال و مرة و دي اللي غاظتني بجد بيتفرج علي كيفية عمل الباترون يا ناس ده انا معرفش اعمل باترون بيتفرج عليه ليه ده مش فاهمة



و في يوم و ليلة يا ناس قررت اواجهه بالهبل اللي انا شايفاه منه ده فبصلي بهدوء و قالي : ماما نصحتني اني اتعلم من كل البرامج اللي بتتكلم عن المرأة و الطفل علشان اتعلم اربي عيالي كويس و لما يبقوا في سن يسمح بحضانتي اطلقك و اخدهم ولا احتاجكك اصلا بدل مكل شوية تهدديني بانك تخديهم



؟؟؟؟؟؟؟؟؟؟؟



يخرب بيتك يا هولاكو يعني مكتفتيش بانك تخربي بيت جيرانك جاية تخربي بيتي انا كمان الله ياخدك يا بعيدة لا و ايه؟ بتحطله خطة طويلة المدي للتخلص مني و حرماني من عيالي ..الهي يارب اشوفك متعلقة من رقبتك في حبل من مسد في جهنم الحمرا ان شاء الله



تمالكت اعصابي و حطيتها في اضخم ديب فريزر بالعالم و كلمته بمنتهي الهدوء و قلتله: يعني هو ماما هددتك من فراغ منتا راميني انا و عيالك و كل شوية تروح عند الست والدتك و دي مش حياة . ثم انا عمري مكنت شريرة معاك علشان تفكر بالاسلوب ده استهدي بالله كدة و استعيذ بالله من الشيطان الرجيم



رد بمنتهي البرود: الشيطان الرجيم ده يبقي انتي و امك و السحلية اللي اسمها مايا..انتي فاكراني مش عارف ان الست امك بتبتعها هنا علشان تتصنت علينا و تنقلها اخبارنا ..لا يا ماما فوقي انا امي رستني علي الحوار كله و حركات الستات الحقيرة







مايا؟؟؟ تجسس؟؟ هي الاخت كانت بتشتغل في المباحث و لا المخابرات قبل كدة؟؟ و حركات ستات ايه؟؟ هو اللي بيقول عليه ده حركات ستات دي حركات دول استعمارية كبري؟؟ اكيد الست دي من بواقي الحرب العالمية التانية علشان كدة مخها فوت







برده بمنتهي الهدوء ردت عليه: حركات ستات ايه يا محروس الله يهديك..الحركات دي احنا ملناش فيها..بس طبعا اللي هوايتهم خراب بيوت الناس ليهم فيها يمكن علشان كدة والدتك فكرت بالاسلوب ده .. انا عمري مفكرت احرمك من عيالك يا محروس لكن انت كنت طول الوقت شايل ايدك من مسؤليتهم علشان كدة ماما كلمتك بالاسلوب ده و هي عمرها متدخلت في حياتنا الا لما الوضع زاد عن حده و كان لازم حد كبير يتدخل



بصلي من فوق لتحت و بمنتهي البرود قالي: ابقي خلي امك تنفعك يا مدام..و الايام بيننا



و دخل اوضة الاولاد علشان ينيم حلس اللي نام علي دراعه و دخل نام جنبه من باب الهجران و التربية الزوجية







سابني لوحدي اكلم نفسي و اهري و انكت و ادعي علي هولاكو ربنا يحرقها بجاز



قعدت طول الليل اعيط و انا بتخيل شكلي و انا مبتهدلة في المحاكم بحاول آخد حضانة العيال و اسمع صوتهم بيصرخوا في المحكمة: ماااااااااماااااااااا متسيبينااااااااااااااااش آآآآآآآآآآآآآآآآآآآ



و انا بعيط و ماما بتطبطب عليا و مايا بتقولي آدي اخرة اللي يفكر في واحد فارجر زي ده



و نظرات هولاكو الشمتانة فيا و في اللي بيحصلي



معرفش الليل مر عليا ازاي بصيت لقيت الشمس في وشي و المنبه ضرب الساعة 7 علشان المفروض نصحي من النوم و ننزل الشغل و مايا بتخبط علي الباب



طاخ طاخ.. كعبولة اصحي افتحيلي



اصحي؟؟؟ هو انا نمت اصلا



فمت فتحتلها الباب و قبل متكمل متكلمني كنت دخلت اوضتي اغير هدومي و في دماغي بيتكون قرار نهائي بلا رجعة حضرت حاجتي و اخدت شنطتي و خرجت من اوضتي و كنت خارجة خالص من الروف لولا اني قابلت المحروس في وشي و كله غضب و هستريا و بيقولي



: ازاي يا هانم متصحينيش لحد دلوقتي انتي غاوية عطلة و تأخير يا ولية



بصراحة ولا بصلته و فتحت باب الروف و خرجت وسيبته يهاتي مع نفسه: رايحة فين يا هانم انا مش بكلمك و حتروحي الشغل لوحدك ازااااااااااي؟؟ انتي...







بصراحة مسمعتش بقية الكلام لأني نزلت السلالم بسرعة و محستش الا و انا بوقف تاكسي علشان اروح الشغل و القرار اللي في دماغي شبه بقي نهائي







***********



في البيت مايا واقفة في الروف و علي راسها رسمة علامة استفهام آآآآآآآآآآآد كدة مش فاهمة حاجة من اللي بيحصل و مستغربة اصلا المنظر اللي شافته سريري متروق محدش نام عليه و هو خارج من اوضة العيال و حضرته اول مفتح عينه بدل ميقول صباح الخير بيقول شكل للبيع و هو عمال يصرخ يصرخ يصرخ و يهلفط بكلام مفهمتش معظمه من كتر الزبد اللي بيتطاير من بوقه و الصريخ و بعد لما ملقاش حد بيرد عليه اضطر يسكت و بص لمايا اللي مزبهلة من اللي بيحصل ده وقد تدلي فكها السفلي من عدم الفهم قائلا: بتبصيلي كدة ليه انتي كمان يا هانم؟؟

مايا: محروس وات هابند..ايه اللي بيحصل ده

محروس: و انت مالك باللي هابند و لا اللي مهابنش خليكي في شغلك احسنلك

بصتله مايا من فوق لتحت و قاتلي: فارجر

و دورت وشها و سابته

محروس في دماغه: ماشي يا مكعبلة اما وريتك شغلك مبقاش محروس



**********************************

اول مدخلت الشغل مكنش فيه حد غيري انا و زكي اصله بيجي بدري اوي قبلنا اكمنه معاه عربية و مبيوصلش عياله قبل ميجي زينا..ليه؟ اصل عقبال عندكم جايب لمراته عربية هي اللي بتجيب العيال و توديهم صحيح هو استهبال انه مكلفها بمأمورية السواق لعياله بس برده مينمنعش انه جابلها عربية و مهنيها و مدلعها ربنا يزيدها من نعيمه بصراحة يا جماعة مراته دي حتة سكرة و تستاهل كل خير



اول مشافني استغرب و قالي : صباح الخير يا مدام سبحان الله اول مرة تيجوا بدري كدة ..اما اروح اقعد بقي مع محروس شوية قبل ميبتدي الشغل

كعبولة: خليك يا استاذ زكي محروس مجابنيش النهاردة انا جيت بتاكسي..اصله وراه مشوار ضروري قبل الشغل

زكي وعلامة تعجب فوق دماغة:!! مشوار؟؟؟ الساعة 7 الصبح..كل شيء جايز

افتكرته حيكتفي بهذا القدر من الحوار و يسكت الا انه كمل و سألني: مالك يا مدام شكلك غريب و عينك منفخة زي متكوني منمتيش..خير في حاجة؟؟

عينك منفخة و لسة منمتيش؟؟؟ حضرته بيتملي في خلقتي علي الصبح؟؟ هو ماله هو منفخة و لا دبلانة حتي..مبقاش الا الملزقين بالفازلين كمان يتكلموا معانا..هو انا ناقصاك انت التاني؟؟

مبصتلوش و عملت نقسي مشغولة في شغل في ايدي و قلتله : لا حضرتك ..تلاقيه شوية ارهاق متشغلش بالك..

زكي: بصراحة الله يعينك ..تربية توأم مش سهلة ابدا..بس برده يستاهلوا التعب

رديت باقتضاب شديد: الحمدلله علي كل حال



في اللحظة دي دخلت تحية و هي بتقول: السلام عليكم و رحمة الله و بركاته

كعبولة: و عليكم السلام

تحية باستغراب: كعبولة ؟؟ ايه اللي جابك بدري

كعبولة: نصيبي

دخلت تحية حطت شنطتها و جرت كرسي و قعدت جنبي و قبل متقول اي كلمة رن الموبايل بتاعي ..مين؟ حيكون مين غير خميرة العكننة بتاعتي..محروس بيه..و لأول مرة من يوم متجوزنا اعمل اكتر حاجة كان نفسي اعملها فيه..قفلت السكة في وشه

مين بقي اخد باله من الحركة دي؟؟ تحية طبعا الست اول ماشافت كدة شهقت مصعوقة و لما لاحظت ان زكي انبه و بدأ يبصلنا باستغراب قاتلي : تعالي يا كعبولة عايزاكي..عن اذنك يا استاذ زكي احنا في الكافيتريا تحت

زكي:بتستأذني ليه يا مدام تحية اتفضلي..لسة ميعاد الشغل مجاش قدامكم ساعة بحالها

تحية: شكرا يا استاذ زكي السلام عليكم

*************

في الكافيتيرا

تحية: ايه يا بنتي اللي عملتيه ده في ايه؟؟ و مالك منفخة كدة ليه زي متكوني منمتيش

بصراحة كلامها كان عامل زي اللي فتح حنفية خليتني انفجرت في العياط و قعدت احكيلها علي كل اللي حصل و قلتلها اني خلاص اخدت قراري

تحية: قرار ايه؟؟؟؟

كعبولة: اتغدي بيه قبل ميتعشي بيا

تحية: نعم؟؟ مش فاهمة..

كعبولة: حطلب الطلاق

تحية مصعوقة: ايه؟؟ استهدي بالله كدة بلاش كلام فارغ

كعبولة : فارغ؟؟؟ ده اي كلام غير كدة يبقي هو الكلام الفارغ..انا حستني لما يبقوا في عمر حضانته و يخطفهم مني و يرميني..ابدا..انا حخلعه حتي الطلاق ميستهلوش..و اخد عيالي و اسافر علي اي مكان و اخليه ميشوفهومش.. علشان يخلي الست والدته تنفعه

تحية: بس يا بنتي حرام عليكي متخربيش بيتك بايدك

كعبولة: انتي بتتكلمي في ايه؟؟ مهو مخروب مخروب

تحية: لا مش مخروب ولا حاجة ..اهدي كدة و خلينا نفكر بالعقل

كعبولة: انا هديت خلاص بعد القرار اللي اخدته

تحية: لا يا تحية ده مش قرار ده خراب..الشيطان عايز يحرق بيتك و انتي بتساعديه اوعي يا بنتي تسمعي كلام الشيطان محدش حيتبهدل غير عيالك حرام عليكي ..مش كدة

كعبولة: اه شيطان اسمه هولاكه الله يحرقه.بس عايزاني اسيبه لما يحرقني وياخدهم من حضني؟؟؟

تحية: لأ طبعا..بس متسبيش الشيطان يدخل بينكم بالشكل ده جوزك تقدري ترجعيه تاني بهدوء و تأني

كعبولة: بس يا تحية بس..انتي متعرفيش المرار اللي انا فيه

تحية: بصي بس..اولا انا عايزة اعرف..مصلحة حماتك ايه في خراب بيتكم؟؟ اكيد هي مش اصدها ..هي بس حرقها انكم هددتوه بالعيال

..فقالت تعمل خطة دفاعية

كعبولة: الله يخليكي يا تحية بلاش سذاجة دي مصلحتها كلها انه يطلقني

تحية : ازاي

كعبولة: اولا انتي عارفة ان محروس اصغر واحد في اخواته و كان اخر واحد قاعد معاها في البيت و تحت سيطرتها الكاملة و كان كل مرتبه رايح عليها و علي مطالبها..دلوقتي جت اللي منعت الاستغلال ده ولازم تتخلص منها

تحية : استني استني.. انتي مش قلتيلي قبل كدة انها دلوقتي متجوزة واحد من دور عيالها علشان وارثة و طمعان في فلوسها ..مرتب ايه بقي اللي حتبصله

كعبولة: مهو يا حبيبتي البحر بيحب الزيادة وابو بلاش كتر منه ..ثم هو هولاكو بيفكر بالمنطق ولا في الصح والغلط هو هولاكو لأنه هولاكو..يعني كان ايه خلاه يغزو العالم العربي الا الطمع في الثراء و الكره للعرب

تحية: هههه..اضحك الله سنك يا كعبولة..حتي و انتي متضايقة دمك خفيف

كعبولة: بقولك ايه متضحكيش في وشي انا عفاريت الدنيا بتتنطط قدامي

تحية و هي بتكتم ضحكها: بصي..حتي لو كدة برده تقدري ترجعي جوزك..بصي يا كعبولة..انتي اتجوزتيه عن حب..يعني اكيد لقيتي فيه مميزات مهواش وحش اوي يعني..حاولي ترجعي الماية لمجاريها

كعبولة: افففف..لأ انا مليش في المجار يا ماية معدنية يا اما فلا..لكن مجاري..نو واي

تحية: هههههههه..مش بقولك دمك سكر..بصي يا كعبولة حلك الوحيد في انك تقلبي الطاربيزة عليها

كعبولة : ازاي؟؟ مش فاهمة

تحية : بصي يا كعبولة..انا حقولك علي جملتين حطيهم حلقة في ودنك في القرآن في آيتين مهمين جدا تمشي بيهم في حياتك في سورة يوسف ايه بتقول: فلما راى قميصه قد من دبر قال انه من كيدكن ان كيدكن عظيم ..و هنا بيتكلم علي كيد النساءو في ايه تانية في سورة النساء في اخر مقطع فيها : ان كيد الشيطان كان ضعيفا
كعبولة حاطة ايدها علي خدها: حضرتك حتسمعيلي القرآن و انتي قاعدة؟؟؟؟؟؟
تحية : افهمي يا بنتي ربنا خالق الكون بيقول في كتابه عن كيدنا عظيم و كيد الله اعظم و عن كيد الشيطان ضعيف ده يخليكي تتأملي اللي بيحصل..اولا ميسعاش في خراب البيوت الا الشيطان و ده كيده ضعيف و مهمتك انك تحافظي علي بيتك و كيدك قوي و بما انك بتسعي في عمار الارض و عايزة تحافظي علي بيتك يبقي خالق الكون معاك و كيده اعظم و اعظم و اللي معاه ربنا عمره ميضيع
كعبولة: برده مش فاهمة عايزة تقولي ايه؟؟
تحية: انا مش فاهمة يا كعبولة..انتي بنفسك بتقولي انها بدور علي خراب بيتك..ازاي تسمحيلها بكدة ..كيدلها زي مبتكيدلك و كل شيء مباح في الحب و الحرب طالما في رضا الله و مبيخالفش شرعه
كعبولة: و انا بقي في الحب ولا الحرب
تحية: في الاتنين يا كعبولة..يبقي لازم تكوني اذكي من كدة..ولا عايزاهم يقولوا انها انتصرت عليكي؟؟؟؟
بصراحة تحية قومت روح التحدي اللي جوايا
كعبولة: بس انتي نسيتي حاجة مهمة اوي يا ست تحية
تحية: ايه هي؟؟
كعبولة: انها من النسا..يعني كيدها عظيم هي كمان
تحية : و الله اعظم و اكبر..بس متنسيش انها موظفة كيدها في خراب بيوت و ده ميرضيش ربنا ..سليم؟؟ لكن انت بتحافظي علي بيتك و هو ده الفرق اللي في صالحك
كعبولة : و الله كلامك معقول بس يعني برده حعمل ايه ..احنا اصلا مولعين من بعض و مش طايقين بعض
تحية : طيب انا حساعدك المرة دي بس المرة الجاية شغلي دماغك
كعبولة: ماشي..ها؟
تحية : قوليلي الاول..هو اتعلم حاجات من برامج المرأة ولا لسة؟؟؟؟؟؟؟
كعبولة: اتعلم يا ستي..بقي بيعرف يعمل الباستا فلورا و كمان المكرونة بصلصة البولونيز
تحية : ههههههه..ايه ده اخد الموضوع جد اوي بقي
كعبولة: امال انا بقول ايه من الصبح
تحية : خلاص اجعلي كيدها في نحرها
كعبولة : نعم؟؟ كلميني عربي الله يكرمك..
تحية : يعني صبي عمايلها عليها و عليه
كعبولة : ازاي...؟؟؟
تحية : اطلعي في يوم كدة و هي عندك و قوليلها محروس يا ماما بقي بيعرف يعمل كذا و كذا تصوري بقي بيعمل الاكل في البيت و بيريحني من الطبيخ شوية ربنا يخيليهولي..
كعبولة : يا نهار مش فايت دي كانت سودت عيشته والدم غلي في نفوخها و فار
تحية : بالظبط.. و ده حيخليه يبعد عن برامج الطبخ و يرجعي عن خطته و يعتمد عليكي تاني
كعبولة : آآآآآآه يبقي كدة من اعمالهم سلط عليهم
تحية : بالظبط..هي صاحبة الاقتراح انه يتعلم ..و هي اللي حتسود عيشته بسبب التعليم ده..و كدة تبقي كسبتي من الناحيتين..هدمتي الخطة علي دماغهم و في نفس الوقت حتخليه يفكر الف الف مرة قبل مينفذ كلام والدته تاني
كعبولة : ينصر دماغك يا تحية..ايه يا بن السهتنة اللي انتي فيها دي جبتي منين الخطط الآنوية و النووية دي و انا اللي كنت بقول عليكي هادية و علي نياتك..ده انتي طلعتي مصيبة
تحية: يا بنتي الدنيا يا ما بتعمل..و اللي ميتعلمش يبقي مبيفهمش
كعبولة : طيب و محرووووووووس؟؟ اعمل معاه ايه دلوقتي؟؟؟ محنا منكدين علي بعض
تحية : تسمعي كلام اختك و تنفذيه بالحرف؟؟؟
كعبولة : قولي و اشجيني
تحية : بصي يا ستي الراجل بيموت في الست الضعيفة اللي يحس انه لو بعد عنها تضيع و تتخبط اتمسكني يا بنتي علشان تتمكني من قلبه و عقله ايه اتمسكن دي؟؟ مش فاهمة
تحية : اقولك يا ستي................

ايه بتبصوا كدة ليه
انتم عايزني اكشف كل اسرار المطبخ النسائي لصنع القرارات
لا انسوا.... المرة الجاية و عليكم خيييييييييير

الي اللقاء يا اصدقاء

المسمار الرجولي

السيد زكي



زكي مين؟؟؟

المسمار الرجولي في مكتبنا الوقور بس بصراحة يا ناس كلنا شايفينه اخونا الكبير و بنحترمه احترام مش طبيعي

كفاية يا ناس حبه لمراته اللي مش بيقدر يخبيه ولا حتي قدام الناس

تخيله اول ميوصل الصبح يديها تليفون و يكلمها:
-ايوة يا حبيبتي انا لسة واصل يا قلبي..اتصلي بيا كل شوية علشان اطمن عليكي--مش عايزة حاجة يا روحي؟؟..طيب يا لولة سلام

و لما يجيله الشاي و الفطار يرجع يتصل بيها:
-ايوة يا روحي اصل الفطار جه بس انتي عارفة مقدرش استطعم حاجة الا لما اعرف انك فطرتي---لأ كلي انتي الاول--صدقيني مقدرش--لازم تاكلي قبلي--طيب بصي ناكل في وقت واحد--1-2-3 هاام ..تسلميلي يا قلبي يلا روحي كملي شغلك

و تلاقي كدة في نص اليوم ساب كل اللي في ايده و اتصل بيها تاني:
-ايوة يا حبيبتي اصلي كنتي عايز اقولك علي حاجة و مش حقدر استني لما اروح البيت
و بعدين يرفع عينه فينا علشان يتأكد ان محدش سامعه و طبعا كل واحدة فينا بتعمل نفسها مشغولة لكن بصراحة بتبقي كلنا آذان صاغية و حنموت و نعرف حيقولها ايه
فيرجع يوطي صوته و يهمسلها بأرق كلمة في الوجود
-بحبك

يااااااااااااااه يا سلااااااااااااام هو لسة فيه في الدنيا دي رجالة بتحب امال المتعايس اللي متجوزنهم ميعرفوهاش ليه
تبص كل واحدة فينا للتانية من تحت الدوسيه اللي ماسكاه و تمصص و تتنهد و تتحسر علي حالها حتي تحية يا ناس لدرجة اني رحت كلمتها
كعبولة: بتتنهدي ليه يا مدام تحية
تحية : من حالنا يا كيكو..كان يجري ايه لو جوزي يقولي الكلمة دي ..و الله كنت عشت طول عمري خدامة تراب رجليه
كعبولة باستغراب: انتي اللي بتقولي كدة اشحال ان مكنتيش بتقولي علي قصتكم من اعظم قصص الحب
تحية : اه يا حبيبتي ده حقيقي الراجل بيبدي اهتمامه بخطيبته و لحد متبقي مراته بشهرين 3 ده لو كان قوي التحمل بعد كدة..بيتحول كل شيء بينهم لروتين..تخيلي في مرة قلتله نفسي اسمع منك كلمة بحبك تخيلي يقولي ايه؟
كعبولة: ايه؟
تحية: قالي--و اقوليها ليه اللي بيحب مراته يبنلها انه بيحبها بأفعاله مش بالكلام ..ثم انت عايزة دليل علي حبي اكتر من اني اتجوزتك..مش تحمدي ربنا انه رزقك بواحد اول مشافك حبك في الحلال محبش يلف و يدور بدماغك..استعيذي بالله من الشيطان الرجيم و اعقلي كدة يا بنتي
كعبولة: هههههههه جوزك ده حكاية..بصراحة الاستاذ زكي ده مشوفتش ولا حشوف زيه..يا بنتي دي مراته من اللي بيعمله معاها خلاها تدوب في هواه..تصوري هي كمان اتعدت منه و كل شوية تتصل بيه لدرجة اني في مرة اعدت اعد عدد المكالمات اللي عملوها لبعض وصلت خلال 5 ساعات بس من الشغل 35 مرة...يااااااااه يا سلام علي الحب
تحية: ربنا يهنيهم ببعض و يهدي سرهم و يبعد عنهم الشيطان و الله انا خايفة ليتحسدوا من الحب ده
كعبولة : اه و الله عندك حق ربنا يسترها عليهم
تحية : يااااااارب

**********************************
شوفوا يا جماعة الاستاذ زكي ده مهواش راجل كامل من مجميعوه بالعكس انت لما تشوفه للوهلة الاولي تحس كدة انه منافق و افاق ليه؟؟

معرفش و متسألونيش يمكن لأنه ملزق دماغه بالفازلين بتاع انور و ده اصلا معدش حد بيستخدمه في دلوقتي جل او كريم و يمكن لأنه مبيتعصبش خالص مش خالص لأ نهائي مهما ان كانت المشكلة اللي بيواجها في الشغل تلاقيه في منتهيي الهدوء او البرود( علي حد قول سوكة) اصل سوكة الوحيدة اللي مش مطمنة لحبه الزايد لمراته و بتقول الراجل اللي يحب في مراته طول الوقت لازم يكون عمل حاجة بيحاول يداريها بس ليه سوء الظن ده مش عارفة بجد

ثم بصراحة يا جماعة انا شكيت يكون الفازلين اليل في دماغه هو السبب اصل يعني انور وجدي كان دايما يطلع واد حبيب يمكن من اثر الفازلين؟؟؟؟؟؟

و الله الواحد بقي محتار

بس بجد احنا يهمنا منه ايه الا انه يكون محترم معانا و نقدره كزوج بيحب ويحترم زوجته
الا انه برده مسمار علشان مش بناخد راحتنا في الكلام

حتقولولي هو الشغل للكلام؟؟؟ حقولكم في البريك تايم..ايه مش من حقنا نرغي شوية ..ده حتي في المدارس بيدوا 5 دقايق بين الحصص من اجل الرغي المطلق مش من حقنا نعمل شوية تمارين للسانا

خلاص انا كدة عرفتكم علي المكتب الوقور و ياريت بس خلي بالكم انا قلت كل حاجة بصراحة او زي منا شيافاها ركزوا كويس علشان الاحداث القادمة في منتهي السخونة

فاصل و نعوووووووود

الآنسة كريمة...و الانسة هدي

اخر الرابطة النسائية بالمكتب الوقور

ليه؟

يمكن لأن الاتنين منكسرين و علي طول مبيتكلموش مش مسألة بعد عننا لكن مسألة خجل من وضعهم و اللي وصلوله و مع ان الاتنين عارفين حكايتهم و عارفين انهم مش السبب لكن الاحساس بالذنب دايما مليهم

طبعا عايزين تعرفوا حكايتهم ايه؟

اولا كريمة ( كيكو التانية)

كريمة بقي يا جماعة عبارة عن زهرية شيك مليانة زهور متفتحة بالوان هادية و رائحة زكية و تمتلئ هذه الزهرية بكم رهييب من الرقة و الهدوء و من كثرة الامتلاء بدأ الرقة تسقط خارج الزهرية تماما عندما تمتليء بالماء و تبدأ بالانسكاب خارجه و طول طريقها تسكب و تسكب و تسكب في الرقة حتي تجبر جميع من حولها علي معاملتها بنفس الرقة و الهدوء

لكن....

و اه من لكن

ابتلاها الله بأب من فصيلة ابو جلنبو (محدش يسأل مين ابو جلنبو ده علشان و الله معرفوش) بس اهو اسم يليق باللي عامله فيها

شوفوا يا جماعة ابوها لما لقي البنت كدة طالعة لوالدتها الله يرحمها رقة و ادب و ذوق اعتبرها سلعة غالية و اااااه اااااااه ااااه من كلمة سلعة دي بقي عاملها بضاعة كل واحد يدخل يتفرج و اللي يدفع اكتر يشيل و اللي يدفع من حيدفع لا مهر ولا شبكة لأ اللي حيدفع ده حيدفع لأبوها تمن تفريطه فيها و بنته حتروح بشنطة هدومها يبيتها في قصر يبيتها في عشة مش مهم المهم الدفع مقدما و كاش .. هنا لا يقبل بالشيكات و لا بال(كي-نت) ولا حتي التقسيط هو الدفع مقدم و اما فلا

جابلها مرة عريس من عصر تحتمس و قالها هو ده العريس اللقطة و بعد اول كلمة قالهالها العريس البت اتسرعت و تقول--متجوزوش يا بابا متجوزوش يا بابا

ليه؟ مش بقولكم من عصر تحتمس اول مشافها قالها: اشيك يا عروشة؟؟..كح كح..

طبعا والدها خلاها تقضي ايام سودة علشان احرجت العريس الفولالي..امال؟؟ يعني هي البنات بتلاقي جواز بالساهل و العريس ده كان فيه ميزة من الناحيتين

اولا--حيدفع كل اللي ابوها يقول عليه

ثانيا-- اخره يومين و يسلم نمر ..يعني بنته حترجع في حضنه تاني و يعملها عرض من اول جديد يعني فيه دفع تاني وواضح انه متبع مبدأ لا تقبض مرة واحدة و لا مرتين بل ثلاثة مرات و القبض للأبد

امال ايه؟ يعني هو الابهات و الامهات دول بيجيبوا عيالهم بالساهل مهم زي مصرفوا عليهم لا زم ينوبهم من الحب جانب ..يعني مش تعب و سهر و بهدلة ويجي عريس ياخدها علي الجاهز لازم يدفع تمن تفكيره في الزواج

اما عن احدي العلل --اسفة--اصدي العرسان اللي والدها جابهولها..فكان شاب كلاس خالص مالص بالص واكيد كالص

اول مدخل قال: هاي يا اونكل ..هاو ار يو؟ واو العروسة صوو كول ..فيري ستايل بس يارب تعجب مامي..امال فين تانت؟؟

ارجوكم يا جماعة متفهموش غلط ده مش زي ملحوس جوزي قلب حرف الطاء لتاء علشان هو محدث نعمة و اول مرة يقول طنط حضراتكم ده قلبها من كتر مياصته يا عيني ..يعني من الاخر يوم متتجوزه تدورلها علي راجل يجوزهم هم الاتنين (ايوة يا ناس مهي سترة الولايا واجبة برده)

عموما ربنا يشفيه مما بلاه بس طبعا كريمة فضلت علي كلمة واحدة ..متجوزوش يا بابا متجوزوش يا بابا ..اهيء اهيء

اهو بقي يا جماعة حياتها طول الوقت كآبة في كآبة و عايشة علي امل انها كل متكبر في السن كل ما شكلها يوحش كل ما ابوها يفقد الامل و يعتقها لوجه الله و يسيبها تتجوز واحد محترم مش واحد من عصر تحتمس ولا بتاع مامي و لا تاجر مخدرات او سلاح

بس يعني مهو الوردة لو دبلت برده بيفضل اسمها وردة و يعني لما توحش ساعتها حتلاقي الراجل اللي يستهالها؟؟ اشك.. الرجالة دي عينها زايغة و ان متجوزش نانسي او هيفا بيتعتبر نفسه متجوز غفير ..بس بجد يا جماعة البنت اتعقدت خالص خصوصا بعد متقدملها دكتور جارهم شاب كدة من سنها (اصدي يعني وقت متقدملها) كان شاب من سنها بيحضر ماجستير و مسافر لندن و قال يتجوز واحدة من اهل بلده متربية علي التقاليد بتاعتنا علشان يتقي فتنة سفره لكن طبعا معجبش ابوها صحيح هو عض في الارض بعد كدة خصوصا انه بعد مرجع من برة بقي دكتور في الجامعة و عنده عيادته الخاصة و صحيح بقي عنده بيت ملك و عزل اهله كلهم من بيتهم وسكنهم فيه لكن يفيد بايه الندم بعد مرجع من برة بزوجة و 3 اطفال لا حيفيده ولا حيفيد كريمة

بصراحة احنا احترنا معاها قلنلها لازم تشوف حد يوقف ابوها عند حده و يعقله و يفهمه ان اللي بيعمله ده حرام لكن هي بتخاف علي زعله خصوصا ان امها و هي بتموت وصتها عليه ومش عايزة تجرحه بأي شكل رغم كل اللي عامله فيها ده بس برده مش هاين عليها

معرفش ليه يا ناس كل مسمع ان ابوها ده افتكر عبد الفتاح القصري و هو بيقول: بضاعة يا خواتي و الخطاب جواعة

بس الحقيقة ان الخطاب (اصدي يعني الكويسين منهم) مش جواعة ولا حاجة ده هو اللي جعان و عايز يشبع بأي طريقة حتي و لو علي مصلحة بنته

قصره ..كلنا بندعيلها ربنا ياخد ابوها علشان تلاقي ابن الحلال( محدش يقولي ادعي ربنا يهديه ..حقولكم اللي يوصل سنه 75 سنه و لسة متهداش يبقي ربنا يستر علي اخرته من دعاوي الناس عليه)

*************************************

نخش بقي علي الانسة هدي

هدي بجد هي الوجه الاخر لعملة كريمة و الاخر بمعني

ان برده ربنا باليها مش بأب بس بأم..ام مين..ام سحلول

هدي بقي يا ناس اخر العنقود اللي وقعت في أرابيز والدتها بعد متجوز اخواتها و مات والدها و بما ان هي الوحيدة اللي باقية و بما ان معاش جوزها مبيكفيش و الوحيدة اللي بتصرف عليها هي هدي فكان لازم تطفش كل العرسان اللي جم لهدي

يعني مرة طلعت للعريس منعكشة..و كبت عليه الشاي السخن المولع( تقريبا هي اتعرفت علي فيفي وقالت تقلدها)

و مرة كانت هدي قاعدة هي و اخوها و اهل العريس المتقدم لها و فجأة النور اتطفي عليهم و لقوا عفريت ابيض طلع عليهم و بيقولهم انا العووووو..حأكلكم كووولكم( انا سايبة الامر لمخيلتكم و معرفة مين اللي عمل كدة)

طبعا العريس هو و اهله فووووووووو ....علي برة عدل و خرج بلا عودة و هدي اغم عليها من الفجعة و اخوها بعد مفوقها حلف ميتدخل في اي موضوع جواز ليها خصوص بعد ما عياله اتصرعوا من اللي شافوه و اتبهدل بيهم عند دكاترة الامراض النفسية بعد الصدمة اللي حصلتلهم

و حاليا بقي والدتها قررت تنهي من بابه معلقه يافطة آآآآآآآآد كدة علي بلوكونتهم

مكتوب عليها بالبونط العريض : ممنوع اقتراب العرسان و الا..

و تحت الكلمتين دول محطوط اربع صور و هم بالترتيب

شبشب * كرباج*ساطور* مسدس

و طبعا الحدق يفهم

و طبعا خلصت حدوته النهاردة و استنوني للمرة الجاية

*****************************

ملحوظة بسيطة:

انا عارفة و الله انكم حبيتوا كعبولة لدرجة ان بعض الناس افتكرتها انا

بس و الله مش انا مش انا --دي قصة من خيالي جمعت فيها كل المصايب اللي شوفتها في جواز صحباتي وقريباتي و حتي بعض مشاكلي الشخصية ..يمكن الرجالة اللي بتظلم مراتتها تحس علي دمها و يبطلوا يبهدلوهم

كمان متزعلوش مني اني بتأخر في الكتابة لكن و الله عندي مسؤليات كتير و ضغط شغل جامد

فدعواتكم ليا اني اقدر اوفق بين الكتابة و الشغل و الحياة الزوجية

ارجووووووووكم متزعلوش من التأخير

حاجة اخيرة الناس اللي زعلانة اني حاطة المديراشن علي التعليقات ارجوكم استحملوني بس بجد فيه ناس ملهاش هواية غير انها تشتم في الناس التانية لدرجة ان غادة برايد نفسها بقت تحط المديراشن و كمان الاخ سووو و المفقوعة مرارتها كلهم دخلهم ناس يقلوا ادبهم و خلاص و انا مش بحب كدة خالص

فاستحموله في سبيل انكم تلاقوا كل الكلام اللي بتقروه محترم

و جزاكم الله خيرا

الست تحية..حيوها حيوها

الست تحية..احلي تحية ليها بصراحة



دي يا اخواني آآآآآخر فرع للمتزوجات في المكتب مش انا قلت قبل كدة اننا 4 مت و 4 مش



يعني 4 متجوزين و 4 مش متجوزين



اخي دي بقي آآآخر فرع المت



بصراحة مشوفتش اخلاق زي اخلاقها ولا شوفت زوج خيالي زي جوزها حتي قصة جوزاهم كانت خيالية يا ناس (ربنا يوعد كل البنات بقصة خيالية زيها او شبهها علي الاقل)



بصراحة هي طول الوقت بتشكر فيه ده غير انها ست برئية جدا و خجولة جدا جدااا جدااا جدااا و بجد لو كل اخلاق الستات زيها كان زمان الوضع اتغير



بس نقول ايه بقي في الشركة اللي ميعلم بيها الا ربنا مسمينها اللهو الخفي (ربنا ياخدهم) قال ايه علشان لابسة خيمة سودا و ماشية تخوفهم بيها و الله يا جماع و بصراحة طبيعي جدا ان شياطين الانس تخاف من الناس التقية المحترمة لأنه ده معناه انهم مش حيلاقوا مكان يعيشوا فيه فبصراحة الحمدلله ان مكتبنا (التقي الخفي) اللي بيرهب الشياطين الحمر اللي بيتنططوا حواليا



و سبحان الله مع ان نقابها كان سبب سريع من اسباب جواوها ازاي؟؟؟ تعالوا نشوف

---------------------------------



اولا الست تحية دي ست ملتزمة جدا جدا من عيلة كلها ملتزمة خاااااالص ابا عن جدا عن عما عن خالا كلهم ماشين علي صراط مستقيم و محدش فيهم ولا في عيالهم يحود عن الطريق ده (عقبالك يا محروس ان شاء الله)



في يوم ما من الايام كانت تحية لسة متنقبتش بس بصراحة هي لما كانت محجبة كانت فتنة للكل ليه؟ اصلها بسم الله ما شاء الله آية في الجمال ابداع من ابداعات الله في خلقه و سبحانه بجد حاجة كدة متتوصفش و هي يا ناس راجعة من محاضرة في الكلية الظهر ظهرلها شابين راكبين عجلة واحدة و قعدوا يلفوا حواليها و يعاكسوها(منا قلت لنها آية في الجمال يا ناس) و طبعا بعد ممشاعر الشهامة ماتت عند كثير من ولاد البلد ولا حد بصلهم ولا عبرهم و العيال دول اترازلوا عليها للصبح فجأة انقشع الطريق عن شاب نحيف ذو لحية خفيفة وقف حائلا بين تحية و العجلة طلع واحد من السفلة اللي كانوا عليها قاله: وسع يا اخ ابعد من الطريق احسنلك

الشاب : آسف مش حعديك

السافل: بقولك وسع احسنلك

الشاب: قلت لحضرتك آسف ميصحش كدة اعتبر الآنسة زي اختك ترضي ان واحد يعمل معاها كدة من فضلك ابعد عنها

بصراحة تحية صعقت من موقف الشاب خصوصا بعد من الشرارة نطت من عيون الشابين السافلين ناحيته و اتسمرت في مكانها من الرعب

بس الشاب لفلها و قالها: حضرتك واقفة ليه يا آنسة اتفضلي حضرتك روحي و انا حبعدهم عنك

مسكه الشاب من ياقة قميصه و شده ليه و قاله: ده علي اساس انك محمد علي كلاي و حتقدر توقفنا

الشاب: لا حضرتك ده علي اساس اني محمد علي بس منغير كلاي و اقدر برده اوقفك

راح ناطط الشاب التاني من علي العجلة ومسك تحية من دراعها و قاله: طيب انا مسكتها و بقي وريني حتقدر تعمل ايه

بصراحة تحية كانت في موقف لا تحسد عليه حاجة مرعبة بجد

و لكن فجأة كشر الشاب عن انيابه و انقلب وجهه من اللون الابيض للون الاحمر من الغضب و انتزع الشاب الذي علي العجلة و طرحه ارضا و لكمه لكمة لم يستطع القيام بعدها و انقض علي الشاب الممسك بتحية و بدأ معه ماتش ملاكمة من اتجاه واحد و كأنه وسادة التدريب مطلقا عليه بعض الالفاظ الفظيعة من فرط الغضب اثناء لكمه اياه
يا عدو الله
بوووووم
يا حقير
..طااااااخ
حسبي الله و نعم الوكيل في امثالك
..ديبببببب

و بعد ان تلون وجه السافل بالفوشيا و الاحمر و الازرق و الاسود تركه الشاب ووقف يعدل في ملابسه التي لم تعد في مكانها بسبب الشجار
و التفت لتحية و انحني تحت قدمها فخافت و لكنها وجدتته يلتقت حقيبتها التي وقعت منها بفعل الخضة و اعطاها اياها قائلا: اتفضلي يا آنسة و روحي علي بيتك بسرعة و ياريت متمشيش في الشارع ده تاني لأنهم من المنطقة و ممكن يضايقوكي تاني و ساعتها ممكن مكنش موجود و الله اعلم ايه اللي ممكن يحصلك

خطفت تحية من ايده الشنطة و طلعت تجري تجري تجري لحد موصلت البيت و طبعا دخلت بيتها في حالة يرثي لها مما وضعها في مهب ريح السين و الجيم الابوية
و بعد معرفة والدها لما حصل لها بصلها بنظرة متمحصة متفحصة و قالها : كدة ظهرت الرؤية مفيش نزول منغير نقاب
تحية : بس يا بابا ده فضل مش فرض ارجوك بلاش انا بتخنق لما احط حاجة علي وشي
والدها: هي كلمة واحدة مفيش غيرها يا تنزلي بالنقاب يا مش حتشوفي الشارع ..ها قولتي ايه؟؟؟؟
تحية و الدموع بتتساقط من عينيها: اللي تشوفه يا بابا
والدها: و دلوقتي خدي النقاب من والدتك ووديني الشارع اللي كنتي فيه
تحية و هي بتمسح دموعها: ليه يابابا؟؟
والدها : لازم اشوف الشاب ده و اشكره

المهم اخدته و راحو يسألوا علي الاستاذ محمد علي(انتوا نسيتوا انه قال اسمه في الخناقة)

المهم قدروا يوصلوا لشقة الاستاذ ووالدها بعتله البواب و طلب منه ينزلهم علشان طبعا ميقدر يطلع ببنته و لما نزل الشاب شكره اوي والدها و قاله ربنا يكرمك و يحفظ عرضك زي محفظت عرضي

فرد محمد وقاله: يا عمي دي اخت في الله يعني برضه عرضي متشرفونا حضرتك و طنط فوق دي والدتي لسة حاطة الغدا ووالدي موجود و يشرفه انه يتعرف بحضرتك

اتحير والدها خالص و قاله: طنط مين يا ابني

فشاورله علي تحية وقاله: طنط ..مدام حضرتك

والدها: لأ يا ابني دي تحية نفسها اللي انت لسة مدافع عنها..اصلي حلفت مهي نازلة منغير النقاب بعد اللي حصلها و الله لولا ان التعليم مهم و الشغل اهم في زمنا ده انا مكنت نزلتها تاني بس محدش ضامن عمره و لازم تعتمد علي نفسها

محمد منبهر: ماشء الله..اللهم قوي ايمانك يا عمي و ايمانها و يثبتكم علي الطريق المستقيم ..ما شاء الله ماشاء الله..عمي اسمحلي اطلب ايد بنتك

؟؟؟؟؟؟؟

هاه..كدة خبط لزق يا مفتري طيب خده علي جنب مش في وش البنية كدة تخضها

عن الموقف ده بالذات تحكي تحية و تقول: قعد اقول للارض..يا ارض يا ارض يا ارض اتفتحي و ابلعيني و اقفلي عليا تاني يعني هو انا احسن من عروسة شارع النبي دانيا ..و بتقول كمان حسيت اني خسيت وهدومي هرولت عليا و العرق بقي نازل مني علي الارض زي المطر و دخت و كنت حقع من طول

اخس عليه محمد يعمل فيها كدة؟؟؟

المهم

ابوها قاله : يا بنتي هو فيه حد يخطب واحدة ميعرفهاش طيب اسأل علينا الاول

محمد: بصراحة يا عمي بنت حضرتك مؤدبة اوي و طول والخناقة مسمعتش صوتها و لما الاقي والدها شخصية محترمة زي حضرتك كدة

و كمان خايف علي بنته من الفتنة يبقي أسأل ليه ؟؟؟ كفاية اللي شوفته بعيني

والدها طيب يا ابني معلش لازم تشور والدك ووالدتك

محمد: بابا و ماما مش حيقوله حاجة و بيثقوا في اختياري .. ارجوك يا عمي حددلنا ميعاد و نجيلكم فيه

والدها: خلاص يا ابني علي بركة الله يوم الخميس اللي جاي تقدروا تشرفونا العنوان هوو.....

محمد ووشه احمر: لا يا عمي انا عارف العنوان

والدها باذبهلال: نعم ازاي

محمد مرتبك: اصلي بصراحة فضلت ماشي وراها بعد الخناقة لسببين ..اولا عجبني اخلاقها و حبيت اشوف ساكنة فين و أسأل عليها ولو كدة اتقدملها و كمان خفت الشابين يجروا وراها تاني و يبهدلوها

والدها بنظرة متمحصة: و عارف رقم التليفون كمان و لا اديهولك

محمد بعد ما وشه بقي شبه الطماطم: لا يا عمي منا ملحقتش اجمع معلومات انا يادوبك عرفت عنوان البيت

ابتسم والدها علي خفيف: علي فكرة انا عجباني صراحتك..خد رقم التليفون و مستنيكم يوم الخميس بعد صلاة العشاء علشان نقدر نتكلم براحتنا كمان اقدر معلومات عنك مهو يا ابني ده جواز و حياة و علاقة مس سهلة

محمد : حقك يا عمي طبعا و لو تحب تأجل الميعاد لحد متسأل براحتك مفيش مشكلة

والدها لا يا ابني مش محتاج الوقت ده كله في انتظاركم ان شاء الله

--------------------------------------------------------

محدش يقولي ها و بعدين طبعا الشاطر حسن طلع ابن حلال مصفي ووالدها وافق عليه وكتبوا الكتاب و علوا الجواب و جابو هاجر و شيماء ربنا يكرمهم حياتهم ان شاء الله

بس انا عايزة اسمعكم تعليقات شوشو علي تفاصيل الجوازة دي اسمعوا معايا كدة

*******************

شوشو: شايفة يا ست فيفي الستات وقفت معلمتش حاجة و استنت لما جه الشاطر حسن و دخل حطم الاعداء بايده مش رزعته بكباية الشاي في وشه

الا قوليلي يا تحية..هو الشارع ده فين بالظبط؟؟

تحية و هي بتضحك: ليه ناوية تروحي علشان حد يعاكسك و يطلعلك شاطر حسن تاني

شوشو: لا يا بنتي و ليه اللفة الطويلة دي..انا حروح و اول واحد يعاكسني امسكه من رقابته و اطرحه ارضا و اقول خدش حيائي و اسحبه علي اقرب قسم شرطة و يا الجواز يا الحبس

---------------------------------------------

نقول ايه بس ربنا يهديكي يا شوشو ... الخطوبات السودا اللي عشتيها اثرت علي قواك العقلية ربنا يهديكي يارب

ايه انتوا لسة قاعدين لأ انا تعبت من الكتابة في البوست ده بقالي 3 ايام بكتبه فاصل و نعود مع واحدة جديدة في المكتب

فاااااااااااااصل

الأنسة عصمت

الآآآآآآآآآآآآنسة عصمت

عصمت شوكت بهجت

و بصراحة كلنا بندلعها نقولها شوشو (ليه؟) دلع شوكت اصل محدش مقتنع بمسألة عصمت دي خالص كلنا بنقول عليها شوكت حتي مدام سوكة صحيح هي اقرب شبه ليها في تصرفتها خصوصا اننا متوقعين لها مستقبل يحمل شكل مستقبل مدام سوكة (ده اذا ربنا فك عقدتها و اتجوزت) الا ان حتي مدام سوكة في لمحة من الانوثة تظهر كدة في بعض الاحيان يعني روج علي تقيل تسريحة عند الكوافير انما شوكت اصدي شوشو نو نو نو

دي اتبرت من الجنس كله شايفه ان النساء دول مش من مستواها و قررت تسترجل و يا حرام لا بقت ده ولا ده

تشوفني بعيط من محروس تقول ضعف

و تشوف بطة متبهدلة من جوزها تقول هبل

تشوف فيفي قطعة الشيكولاتة تقول عته (اكمنها قررت تحتفظ بانوثتها تحت الحجاب) و في الرايحة و الجاية ماسكاها تقولها:

-بقي يا هانم حضرتك بتتحجبيلي و مدارية انوثتك ...طيب حتتجوزي ازاي؟ ده انا اللي مش محجبة مش لاقية راجل واحد عنده دم يتجوزني فاكرة نفسك حتلاقي عريس انسي يا عانسة (متبصوش كدة بتقولها عانسة نفسي حد يعرفها حقيقة العانسة اللي في المكتب دي تبقي مين؟)

-جري ايه يا هانم انتي حتعمليلنا فيها ماما الحاجة عيشي يا بنتي سنك بكرة تندم يا جميل علي شبابك اللي راح هدر(ده علي اساس ان الآنسة عرفت تستثمر شبابها عل احسن وجه)

و الحقيقة يا جماعة هي قلبها ابيض بس هي اللي شكلها كدة و في لحظة صفاء كدة في مرة سألتها انتي علي طول قالبة علي قطعة الشيكولاتة قاتلي بصراحة بصراحة بصيلها و بصيلي وقارني الوضع هي زي مانتي بتقولي كدة قطعة شيكولاتة و انا معنديش ذرة جمال فلو يعني في يوم من الايام واحد عازب دخل المكتب يدور علي عروسة فأكيد حيفضلها عليا (ده طبعا علي اساس ان العزاب ممكن واحد فيهم يستجري يدخل مكتبنا بعد السمعة اللي عملتهالنا مدام سوكة و الانسة فيفي...ولا علي اساس ان كل عازب بيجي الشركة يدخل ينقي من معرض الآنسات اللي في المكتب)

قلتلها: بصراحة يا شوشو شوفت كتير و قليل مشوفتش زي تفكيرك ربنا يكملك بعقلك

*****************************************

بصراحة يا جماعة و علي حد مسمعت ان شوشو مكنتش كدة الاول بس اللي حصلها هو اللي عمل فيها كدة

ايه اللي حصلها:

خطيبها الاولاني اللي اتخطبتله وهي في الكلية و كان زميلها في نفس السنة اتخطبلها بس لأن والدها كان حاله متيسر و جايبلها شقة و عربية كان معتبرها المكروباص اللي بياخده من باب البيت للكلية و العكس و مفيش مانع من مصروف الجيب كمان اللي كانت بتديهوله و الكورسات اللي كانت علي حسابها و الكافيتيريات اللي شافها لأول مرة في حياته علي اديها وقضي معاها اربع سنين في الجنة اكل و مرعي و قلة صنعة و بمجرد مطلعت نتيجة البكالوريوس فص ملح و داب ..ايه ؟؟ في ايه؟؟ حصل ايه؟؟ قعدت تدور عليه اكتر من اسبوع خصوصا بعد ما ساب السكن اللي كان عايش فيه و اخيرا لقيته عند اهله في الفلاحين مستخبي منها و لما لقي المواجهة حكمت قالها بكل برود و هو بينفخ دخان السيجارة في وشها:

بصي يا بنت الناس من قمة غباءك انتي و اهلك انك تتخيلي ان واحدة دميمة زيك ممكن تلاقي حد يبص في وشها و يتجوزها بصراحة انا اهلي مكنش معاهم مصاريف تعليمي و كان لازم لما انزل مصر اشتغل بس لما قابلتك غنتيني عن الشغل ووجع القلب بصراحة ليكي الفضل في اللي انا فيه دلوقتي خصوصا بعد محوشت من وراكي تمن خلو رجل لشقة اقدر اتجوز فيها و بمجرد ملاقي وظيفة حتجوز اي واحدة الا انتي علشان متتنطاطيش عليا بأفضالك عليا و في نفس الوقت يوم محتجوز حتجوز واحدة حلوة مش اشبه بغفير الدرك بتاع القرية هنا لحد هنا و كفاية اوي و متهيألي اني كنت شديد الاحترام معاك و مصدرش مني حاجة كدة ولا كدة

(بصراحة الراجل عداه العيب ..ده كفاية صراحته ياناس ..هو في شباب اليومين دول كدة؟؟؟)

لفت شوشو و كانت حتخرج من باب بيته الا انها قبل متمشي اتدورتله و قالتله : بكرة تندم يا جميل

و بصراحة جميل ده ندم اشد الندم بعد مسابها و باس تراب رجليها و رجل ابوها علشان ترجعله (ليه؟) لأنه بعد مدفع خلو الشقة و راح جاب ببقية الفلوس اللي حوشها من وراها شبكة علشان يخطب واحدة تانية طلع صاحب العمارة نصاب و لا فيه شقة ولا حاجة و طبعا ابو العروسة لما لقي مفيش شقة عطاله استمارة 6 و قاله يا بني زي مدخلنا بالمعروف نخرج بالمعروف و طبعا الشبكة و الهدايا اللي جبتها لبنتي هي متقدر ترجعهالك مش كفاية قلبها اللي انكسر لازم تفضل حاجة تعوضها عن غيابك وولاد الاصول ميطالبوش بهدايهم و قفل في وشه الباب و بعد متلطع علي ابواب المؤسسات في انتظار وظيفة ادرك انه ضيع كنز من ايده و علشان كدة رجع يبوس الايادي بس علي مين شوشو و اهلها برده عندهم كرامة و رفضوا كل المحاولات للرجوع

ولا خطيبها التاني

اللي خطبها بعد ما خطيبته الاولانية عطيته الصابونة اللي هي وفضل يتزحلق يتزحلق يتزحلق لحد موقع عن رجل شوشو وكانت القلب الحنين الصدر الدافيء اللي احتضنه و انتشله من الضياع و برده قعدوا 4 سنين مخطوبين و في يوم وليلة فص ملح وداب و برده قعدت تدور عليه و لما لقته قالها: بصي انتي انسانة ممتازة و انا مستهلكيش انا قعدت اطول في فترة الخطوبة علي امل اني احبك بس مع الاسف محبتكيش و كمان خطيبتي الاولانية بعد مطلقت من جوزها الغني اللي سابتني علشانه طلبت ترجعلي تاني و لقيت نفسي لسة بحبها و حرجعلها و بكرة ربنا يرزقك بواحد احسن مني بكتير

رفعت شوشو عينها من الارض و قالتله: بكرة تندم يا جميل

و في الحقيقة و في الواقع و الخيال برررررررده جميل ده ندم خصوصا بعد ممراته الجديدة اتطلقت منه بعد ملقت واحد اغني من جوزها الاولاني و أخدت اللي وراه و اللي قدامه و رمته في الشارع

و برررررده رجع يبوس الايادي بعد معرف قيمتها بس بررررده هي ولا عبرته

و الحقيقة يا جماعة البنت ليها حق تتعقد هي و اهلها بالشارع اللي ساكنة فيه

هو فيه حقارة ممكن تتعرضها واحدة في بداية العمر اكتر من كدة

ربنا يفك عقدك يا شوشو و يفك عقدتي معاك لولا انك صاحبتي و حبيبتي لكنت خليتك اتجوزاي جوزي بس متهونيش عليا احطك في جحيم هولاكو حفيد جانكيز خان

يلا يا بنتي كلنا لها

فاااااااااااصل و نعووووود

بطة بطوطة و جوزها و ضرتها

مدام فاطمة(او زي مبندلعها و نقولها بطة)

حتة ست سكرة ست مصرية بصحيح تحس في شخصيتها بالمحشي و المطبخ و شغل البيت لدرجة انها بتيجي المكتب تقمع البامية و تنظف الخضار علشان تروح تطبخه و مفيش مانع من بعض شغل التريكو و الكروشيه في المكتب سواء كانت بتعمله لعيالها او حتي من اجل البيع (اصلها رائعة في الشغل ده و من باب زيادة الدخل بتبيع و علي رأيها اهي نوايا تسند الزير) ده علي اعتبار ان الزير سليم و مش بيسرب مهي يا جماعة بصراحة حالتها صاعبة اوي عندها 8 عيال محدش يبصلي كدة ويقولي هو لسة في حد بيخلف العدد ده حقولكم ايوة مدام بطة خصوصا لما يكون جوزها صعيدي و عايز ولد و هي جابتله 8 بنات و حتي هذه اللحظة حاسة ان حياتها مهددة و ممكن يتجوز عليها في اي لحظة (رغم انها ياعيني طالع عينها في الشغل و البيت علشان راحته و هو عمره مدور علي راحتها و كمان جايبلها ضرة في البيت) محدش يبوصلي و يقولي انتي مش لسة بتقولي حياتها مهددة يعني لسة متجوزش حقولكم ايوة بس هو جابها اللي أسوأ من الضرة ( أمه)

و أه أه أه من امه و اللي عملاه فيها

مدام بطة دي يا خوانا شغالة زي الدينامو في الشغل و مبتونش بين تنطيف الخضار والتريكو و طباعة الورق و التقارير و يا قلبها لا تحزن

و تروح البيت تشتغل خدامة فول ابوشن طبخ و مسح و كنس و غسيل و عصر لما تقع من طولها

محدش يوقلي مجبهاش غسالة ليه حقولكم هي اللي انه تتحكم في بيته تقدر تجيب حاجة يوم متكعبلت يا عيني و اتكسر دراعها و طلبت منه علي الاقل غسالة عادية و هي تقوم بالباقي طلعت ضرتها تقول(عيشنا و شوفنا ده احنا مكناش ستات بقي كانت الواحدة فينا تخلف بال12 عيل و كلهم رجاااااااااالة و تقوم بشغل البيت كله) و الهانم ناسية ان الست بطة بتشتغل 8 ساعات زيادة علي شغل البيت

يوم ما بطة طلبت منه يجيبهها واحدة اخر الشهر تساعدها في التنفيض طلعت ضرتها برررررضة تقول( انا مضمنش نظافة الخدامات بطلي مياصة يا هانم)

كل ده كله يا عيني بطة مستحملها علشان عيون جوزها الهمام و ياعيني كل يوم تيجي تعيط في حضني او حضن فيفي بس مبترضاش تقول لسوكة لحسن تقوم بالواجب مع جوزها و ضرتها و بعد ده كله جوزها راح اشتري دش (متبصليش كدة ايوة دش) اللي استخسر الغسالة العادية في مراته راح جاب لنفسه و حط تحت كلمة لنفسه دي الف خط الدش ..ليه؟ علشان يتفرج علي المغنيات الرقصات من اجل امتاعه خصوصا ان مراته بقت شبه برميل الطرشي( علي حد قوله ربنا ياخده..يعني هي اللي تخلف 8 حتبقي مانيكان؟؟؟؟)

طبعا حتسألوني هو جايبه لنفسه طيب حاطط الوصلة فين ..حقولكم حاططها في اوضة الست والدته علشان لما يخرج من البيت حتقفل عليها بالمفتاح خصوصا ان الدش مليان كارتون ممكن يفسد اخلاق العيال كمان توفيرا لكهرباء التليفزيون(طبعا ده علي اساس ان الست والدته مش مقضياها مسلسلات و افلام ليل نهار

بس مدام بطة استريحت بعد مجاب الدش ده و ده بصراحة غاظني انا لو منها كنت فتحت نفوخه ان جاب لنفسه و امه دش و مانعه عن العيال و مستخسر في كراته حتة غسالة و بصراحة رحت واجهتها بغيظي منها بس قالتلي:

شوفي يا كيكو يا حبيبتي الدش ده اكبر هدية دخلت اللبيت فصلت مخلوف و امه عن حياتنا (علي فكرة مخلوف ده يبقي جوزها)

سألتها ازاي؟ و ايه فايدة ده؟؟

بطة: بصي يا ستي اولا مبقاش بيدقق في ايراد الشغل الجانبي بتاعي زي الاول و بقيت بحوشه كله

كعبولة: يعني مثلا انتي عايزة تقنعيني ان شغل بلوفر ولا مفرش بيجيب فلوس

بطة و هي بتضحك: و انتي متخيلة ان هو ده شغلي بس؟؟؟

كعبولة: امال ايه؟

بطة: يا ستي الخضار اللي بنظفه كل يوم ده مش لبيتي

كعبولة: امال لمين؟؟

بطة: بصي يا ستي انا متفقة مع فراش الشركة يقول للناس ان مراته بتبيع خضار متنظف جاهز بس سعره اغلي شوية من العادي و طبعا كل المطحونات امثالنا بتحتاجه علي الاقل تريح شوية من الهم اللي وراها وكل اخر شهر بديله 1/5 اللي كسبته

كعبولة مش مصدقة: يا سلام؟؟ امال بتاكلوا ازاي في البيت

بطة: ربنا يخليلي بناتي بروح البيت الاقيهم مخلصين تنظيف الاكل و البيت منا الحمد لله بناتي كبروا برده

كعبولة: ماشاء الله عليهم ربنا يحميهوملك.بس مقولتليش الفلوس دي فادتك في ايه؟ و مهما ان كان اللي بتوفريه حيعملك ايه يعني؟

بطة: كتير..اولا من الفلوس اللي حوشتها اتفقت مع اختي عديلة منتي عارفة انها ساكنة في وشي نشتري مكنة تريكو و كروشيه مع بعض شركة و نشتغل بيها و نجيب فلوس تقضي علي المعيشة متنسيش اني عندي بنات و بكرة يتجوزوا و يحتاجوا جهاز و طول مالست حماتي ورانا مش حنقدر نحوش مليم

كعبولةو عاجبتها الفكرة: عندك حق ..امال ايه اللي بتعمليهم في الشغل دول؟؟

بطة: لا يا حبيبتي دول لزوم الشغل قدام جوزي ان اللي بعمله مش جايب همه ثم اليدوي ببيعه اغلي من اللي بالمكنة و الحمدلله مشروعنا الصغير بيكبر منغير محد يحس بيه

كعبولة: بس مش حرام عليكي يا مدام بطة البنات يتبهدلو في هدة الغسيل اليدوي بتاعكم ده؟؟؟؟

بطة سخسخت علي روحا من الضحك: غسيل يدوي ايه يا بنتي انا جايبة غسالة فول اتومامتيك

كعبولة: لالالا بجد؟؟ انتي مش قلتي رفض يجبهالك؟؟

بطة: اه هو رفض يجيبها بس انا لما مرتبي زاد مقلتلوش و الزيادة دي رحت جبت بيها الغسالة تقسيط و التقسيط بيتخصم من الراتب و التقسيط ده شركة انا و اختي علشان انا مخلية عندها الغسالة و احنا الاتنين بنغسل فيها و اهو بدل محامتي بتوظها علشان تقرفني و كمان بدل السين و الجيم و منين و انتي عارفة ممعناش

كعبولة: لالالا يا بطوطة ده انتي طلعتي حكاية و مش سهلة ابدا

بطة بحزن: السهل في الزمن ده يا بنتي بينداس و انا اتبهدلت كتير علي ايد مخلوف و امه

كعبولة بتطبطب عليها: معلش يا حبيبتي بس و الله ربنا حيكرمك في بناتك

بطة و هي بتمسح دموعها اللي نزلت غصب عنها: هو انا لولاهم كنت عرفت اكمل هم اللي مصبرني علي الهم ربنا يخليهملي و يحفظهم

كعبولة: يارب ياحبيبتي يارب

بصراحة من ساعة المحادثة دي احترمتها اوي بجد ست اصيلة مع ان جوزها ميستهلش خالص يلا ربنا يتوب عليها من الهم اللي هي فيه

بكرة اجييلكم واحدة تانية من المكتب المحترم الوقور

الي اللقاء