مكتب محترم ووقووور

هو احنا كنا وصلنا لحد فييييييييييين؟ امم مش فاكرة

لا لا افتركت لحد ممحروس سابني و مشي (خسارة فيه البرفان الغالية اللي حطيتها)

كا علينا سيبونا من محروس حاليا و خليني اعرفكم علي مكتبنا المحترم الوقور

انا كنت قبل كدة نبذة عنه بس حكلمكم عنه بالتفصيل حاليا

الاول اعرفكم علي مدام سوكة (او سكينة بس احنا بنحب نقولها سوكا علشان يبقي شديد البعد عن ريا اختها)

مدام سوكة ست نشيطة جدا, جد جدا, قوية جدا جدا جدا

و انا عن نفسي بحترمها و بحبها موت و الحقيقة هي مثال رائع للستات مش علشان هي صنعت المعجزات في جوازها لأ ابدا..انما لم ترضي بالرضوخ و البكاء علي الذي مضي (زيي كدة) و قررت انها تاخد حقها بدراعها لأن الدنيا (علي حد قولها) غابة البقاء فيها للاقوي فمن باب السعي للقوة انضمت لحزب نسائي ضخم قوي شرس من اجل ان تصبح عضوة فيه يجب ان تمر بامتحانات رهيبة في الجودو والتايكوندو و الملاكمة و المصارعة الحرة ايضا..بس كمان الحزب ده طلعوا ناس ذوق اوي الصراحة اكمن مدام سوكة لما انضمت لهم مكنتش تعرف اي حاجة من الحاجات دي عطوها كورسات فيها و رغم انها جالها تمزق في اربطة الركبة و تفتت في عظمة الترقوة و كدمات عديدة في انحاء جسمها ووشها ورم لدرجة ان عينها اليمين كانت حتضيع في ماتش ملاكمة و علي اثره لبست نظارة (لأ سوري مش نظارة دول او يومين بس و لما لقت شكلها مش حلو ركبت لينسيس) الا انها مرت من اختبارات الجمعية بنجاح و اصبحت عضوة ناشطة في جمعية (متكلميش جوزك باللين بس احدفيه بالطين) و ده طبعا كان انجاز كبير و بصراحة كلنا بنفتخر بيها رغم انها اصبحت الشخصية الكاريكاتيرية الفلاشية اللي اسمها(توتو عضلات نفاخ البالونات) و رغم ان جسمها اقرب يكون لجسم هوجان من جسم امرأة و رغم ان صوتها بقي اطخن من صوت محروس الا انها يا جماعة شخصية فريدة من نوعها كفاية انها محطمة معنويات مقصوف الرقبة جوزها علشان نحترمها كفاية انه لما حب يزعقلها كان مصيره القذف من الدور التاني(صحيح هم ساكنين في الدور السابع الا ان يومها حظه حلو علشان كانوا في زيارة لمامتها) كفاية انها لما تعبت من المواصلات اجبرته يجيب عربية تقسيط علي حسابه تقضي بيها مشاوريها و هو ياخد مواصلات و مش مسموحله بالتاكسي علشان ميبوظش الميزانية خصوصا انها مبتديلوش ولا مليم من مرتبها لا وايه و بتاخد منه مصروف ايدها كمان...يا سلااااااااام آدي الستات ولا بلاش مش خيبة زينا و بصراحة الست مبتتأخرش اللي بتقصدها في علقة لجوزها بصراحة مبتتوصاش بتقوم بالواجب و زيادة

يا سلااااااااااام ربنا يخليكي لينا يا مدام سوكة

__________________________________________

نخش علي واحدة من الفريق اللي مش متجوز ..أقولكم علي مين..أقولكم علي مين ..آآآآه فيفي حبيبتي فيفي دي

فيفي

فيفي دي يا ناس حتة سكرة...لالالا .لو قلت عليها كدة حتقول عليا بقيت لوو كلاس زي جوزي

فيفي دي قطعة شيكولاتة مغلفة بالسوليفان الاحمر و مش اي شيكولاتة لا دي شيكولاتة بيضا مغطسة في قطع البندق و الكراميل

يعني كدة من الاخر تخليكم تدوبوا فيها دوب

حتقوليلي طيب هي ليه متجوزتش طالما كدة؟

حقولكم علشان البقية الباقية من الرجالة طلع معندهومش نظر من الاخر العمي بقي ماشي فيهم زي الطاعون

اه هي اسمها فييفي بس البت كدة محترمة اوي و محجبة و ملتزمة اوي و معندهاش رمادي هو يا ابيض يا اسود يعني انا بقالي في الشركة دي اكتر من 5 سنين عمري مشوفتها بتكلم راجل و لو اتزنقت اوي يعني تخلي واحدة فينا تكلمه بس هي لسانها ميخاطبش لسانه و ده عطي سمعة مهببة عنها في الشركة انها هابلة و بتتكسف بسهولة و متعرفش تتكلم و صوتها مبيطلعش فواحد سافل ربنا ياخده حب يستظرف فيها و يمسك ايدها فما كان من فيفي الا انها دبت كباية الشاي اللي في ايدها التانية في وشه و طبعا اتسببتله في حرق من الدرجة التانية و ال 7 غرز حكاية في وشه و اتصلت بالبوليس و عملتله محضر تحرش و القضية بتاعته شغالة لحد دلوقتي في المحكمة ده غير انها وصلت الموضوع لمجلس ادارة الشركة و اتسببت في فصله نهائي بسبب فعله الفاضح(علي حسب النص اللي ورد في تقرير الرفد)

فاصبح الجميع بيخاف منها و بيعتبروها نسخة مصغرة من مدام سوكة

علي فكرة هي فاجئتني باللي عملته انا نفسي لو حصل معايا اللي حصل معاها كان اخري اصرخ و اعيط اه حفضحه و اتسبب في رفده لكن مش لدرجة المحاضر و اقسام البوليس

بس برده هذا لا يمنع كم الرقة و الادب اللي هي فيهم و رغم ان كل الناس بتبصلها علي انها حاطة قناع( آسفة اصدي الرجالة بيبوصلها كدة اما عنا احنا الستات فطبعا بنحيي رد فعلها الايجابي) الا ان الحقيقة انها بجد رقيقة بس مهياش هابلة و لا سهلة و التجربة خير دليل

_______________________________________

خلونا ندخل علي واحدة تانية متجوزة

نشوف مين نشوف مين؟؟؟؟؟؟؟

موووش عارفة اقولكم كفاية عليكم دول النهاردة و اكلمكم بعدين

و لنا لقاء

الزواج شركة من طرفين..يعمل بها طرف والاخر يمسك بالريموت كنترول

طيب بزمتكم مش هي دي الشركة ده حتي فيه مثل عبر بشدة عن هذه الحقيقة المؤلمة بيقول(اطبخي يا جارية..كلف يا سيدي)

علي فكرة انا متأكدة ان المثل ده اللي طلعه واحد راجل لأن مع الاسف رجالة كتير مش شايفين مراتتهم الا جواري او خدم تشبعه كووووووول رغباته و مبتفحش بؤها ولا تقول بم

كان صاحب بابا (ايام مكان عندي اب) سمعته بيقول مثل شبه الرجالة كدة(غلس) بيقول فيه(كلهن جميلات..الا من كتبت لنا)

و ده برررررده مثل رائع و يعبر عن شخصية الرجل النمرودة و عدم تقبلهم للنصيب

خدوا عندكم مثلا محروس في كل رايحة و جاية يقولي

مشوفتيش مراتات اخواتي عاملين ازاي؟؟؟ كل واحدة قايمة بواجبات البيت علي سنجة 10 (ولو اني لسة مش فاهمة مين سنجة دي بس يلا عديها)

بيوتهم قشطة و الستات بيبرقوا (تقولوش يا ناس صييني مغسول؟؟)

و رغم ده كله اخواته بيشتكوا من مراتتهم لا و كمان بيقولولي ان جوازهم بيضربوا المثل بيا في تحمل المسؤلية

يبقي ايه معني الكلام ده غير ان الرجالة بيطبطروا علي اللي في ايدهم..اكيد مرات غيري احسن لكن مراتي انا(استغفر الله العظيم خلقتك يارب شريفة)

********************

سبونا من النظرة الفلسفية البحتة و خلونا في المهم

احنا كنا وصلنا لحد فيييييييييين؟؟اه

لحد ممدام سوكة وصلتني البيت بصراحة اكسفت اقولها اسامي اولادي و اكسفت كمان اقولها تخليني اعدي علي ماما اخد الاولاد قلت اروح البيت الحقلي ساعتين نوم و اقوم اخلص اللي ورايا قبل مالسيرك القومي يبتدي

بصراحة الست طلعت ذوق حتي مرضيتش تطلع معايا البيت علشان متتعبنيش في واجب الضيافة(بس بعد كدة اعترفت انها مكنش عندها استعداد تطلع للسطوح علي رجلها و اكيد حتبقي سنداني و يتقطع نفسها و في الاخر حيبقي جزاتها كباية شاي بالكتير) بصراحة في الحالتين كتر خيرها و بنظرية منطقية بحتة هو ده كان فعلا اللي حيحصل معاها والا كان محروس اتهمني بالفشخرة قدام اصحابي و تبويظ ميزانية البيت فبصراحة كتر خيرها وفرت عليا و الله(مش ست تبقي حاسة بالقهر المنزلي و مسامحة فيه)

ما علينا اول مدخلت البيت قلت حريح شوية و ظبط المنبه يرن بعد ساعتين علشان اقوم اخلص اللي و رايا و اول مدخلت سريري أ....

خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ

طاخ طاخ طاخ

افتحي يا هانم

طاخ طاخ طاخ

افتحي ياللي نايمة علي ودانك وسايباني محتاس

طاخ طاخ طاخ: انتي يا ولية افتحييييييييييييييي

كعبولة: مين الكولد ده اللي جاي يصيحيني من نومتي ياربي ده انا مصدقت اريح ساعتيني علشان الحق اخلص اللي ورايا قبل ممحروس يجي بالعيال..يقلق منامك ياللي بتخبط

قامت كعبولة و الرزع شغال علي الباب: طاخ طاخ طاخ

فتحت كعبولة الباب و مستحلفة للي بيخبط لتبهدل كرامته و عيشته و اول ماتفتح الباب اتفتح معاها دش جديد

محروس: يخرب بيت جنااااااااااااانك ايه يا ولية مش كفاية دبستني اجيب العيال لوحدي كمان دخلتي قبرك تنامي فيه انت ست انت ده انت ست اشهر انتي ام انتي ده انت ام 44 اتجنيتي يا ولية في حد يقفل علي نفسه قبره وعارف ان عياله جايين

كعبولة و هي مستغربة و بتفتح عنيها بالعافية: محروس؟؟؟ ايه اللي جابك بدري كدة

محروس و الشرر يتطاير من عينه: بدري؟؟؟ بدري؟؟ بدري من عمرك انتي عارفة الساعة كام دلوقتي

كعبولة: كام؟؟؟

محروس : الساعة 5:30 يا هانم

كعبولة مش مصدقة: لا بتهزر!!!يعني بقالي اكتر من 5 ساعات نايمة؟؟؟لالالا مستحيل.

محروس و الثورة في اوجها: بهزر ؟؟بهزر؟؟ انتي عمرك محتحسي بالمسئولية و عمرك محتشوفي خير ابدا انتي اخرك تترزعي في حضن امك باكينام هانم

البواب: يا استاذ محروس انا سايب البوابة لوحدها ممكن يدخل حرامي شيل عيالك عن دراعي و احرق دم الست هانم بعدين

لف الاتنين ورا ظهرهم لقت كعبولة البواب شايل عيالها الاتنين زي ميكون شايل قفتين تحت دراعاته طلعت تجري عليه تاخد العيال منه و بتزغر لمحروس و تقوله: كمان تعبت الراجل معاك مش عارف تشيل عيالك و الشنط؟؟

محروس: ليه يا هانم هو انا ب600 ايد

كعبولة: منا بشيل كل حاجة علي قلبي الصبح ليه؟؟ كنت انا كان ب600 ايد

محروس بزئير: دي شغلتك ياهانم مش شغلتي انا

كعبولة: لا و شغلتك انت كمان امال علي اي اساس حيقولولك يا بابا؟؟

محروس: لما يقولولي يا بابا يبقي يحلها ربنا

محروس: يلا هانم جهزيلي الاكل علشان اطفح و انام؟؟

كعبولة: اكل؟؟؟

محروس : ايوة يا هانم اكل....حسك عينك تقولي معملتش

كعبولة: احنا اتفقنا تجيب اكل جاهز النهارة

محروس و هو بيصرخ: الكلام ده يا هانم لما كنتي حتروحي معايا لكن انتي بقالك اكتر من 6 ساعات في البيت لوحدك كنتي بتهببي فيهم ايه؟

كعبولة: ماديك شوفت راحا عليا نومة

محروس: آآآآآآآآآآآآآآآآآآآآآآه يخرب بيت الجواز و سنينه انا رايح اطفح عن امي..دي بقت عيشة تقرف

و اخد الباب في ايده و رزعه طاخ

العيال صحيوا عايزين يغريروا و يرضعوا و البيت يضرب يقلب و مفيش اكل في البيت و لازم تعمل و هي حتموت من الجوع ولازم تعمل اكل لبكرة و...

اتصلت كعبولة ببكينام هانم و قالتها:الحقيني يا ماما آآآآآآآآآآآآآآآآآآآآآآآآآآآآ

___________________________________

باكينام هانم و هي بتدخن السيجارة: لالالا..كدة مش حيتفع خالص انتي لازمك حل عملي

كعبولة: اهيء اهئ اعمل ايه بس يا ماما؟؟

باكينام هانم لفت لمايا اللي بتغير للعيال: مايا بصي الافضل بعد كدة انك تيجي عن كعبولة الصبح متجيش عندي تخلي بالك من الاولاد هنا و ترتبيلها البيت و تعملي الاكل

مايا: نوو واي..مستحيل يا أنتي(أنتي دي طنط بس بعوجان شوية)..كل يوم اطلع الادوار دي علي رجلي و كمان اقعد في بيت مخفوس ..اوه ريلي نو واي..سوري يا كعبولة

باكينام: معلش يا مايا ده حل مؤقت لحد منشوف حل تاني

مايا بتفكر: اممم.اوكي..بس طبعا المرتب حيزيد

باكينام : اوكي

كعبولة: اوكي ايه يا ماما و انا حجيب الفلوس دي كلها منين

باكينام هانم: ملكيش دعوة انا حكملك بس طبعا حتخلي جوزك يدفعهلا كأنه بيدفع للحضانة مهو لازم نقرصه شوية

كعبولة: ماشي

باكينام: و كمان مايا حتمشي اول متيجي البيت..علشان تلحق تيجي البيت عندي تنقذ ما يمكن انقاذه

كعبولة: ماشي يا ماما امري لله

باكينام: و حاولي توضبي نفسك كدة علشان لما يجي مفقوس كلمتين حلوين منك علي ضحكتين و لطفي الجو

كعبولة: حاضر يا ماما

باكينام: اسيبك بقي و خلي بالك من روحك..و مايا حتعدي عليكي من الصبح بدري ..اوكي يا مايا؟؟؟

مايا : اوكي أنتي

باكينام و هي بتسلم علي بنتها و تبوسها يا لا يا حبيبتي خلي بالك من نفسك و ادي العيال مايا نيمتهم تقدري تفضي لنفسك..يلا يا حبيبة قلبي سلام

كعبولة: سلام يا ماما

____________________________

دخلت كعبولة اتروشت و حاولت تستعيد ذكريات يومين العسل بتوعها(معلش يا جماعة اصل محروس مخلهاش تقضي الا يومين عسل بس و طلعلها الوش التاني علي طول) و حضرتله العشا و أضاءة الشموع في أن-روف جاردن بتعهم و فضلت مستنياه ساعة،اتنين،تلاتة و راجا عليها نومة ياعيني و لقت اللي بيزقها في دراعها : هاي..انتي قومي ادخلي نامي جوه

فتحت عينها بطيء: محروس؟؟؟ انتي جيت؟ هي الساعة كام دلوقتي؟؟

محروس : الساعة 11 بالليل..ثم ايه اللي نيمك كدة؟؟؟

كعبولة: مستنياك يا حبيبي

محروس: حبيبك؟؟؟ خير اللهم اجعله خير

كعبولة: حقوم احضرلك العشا

محروس: لا متحضريش..انا كلت عند ماما خلاص و يلا قومي علشان حنصحي الصبح بدري نودي العيال

كعبولة: لا متقلش مايا هي اللي حتيجي الصبح

محروس: مايا ؟؟؟ حتيجي؟؟ لا مش فاهم فهميني

قعدت كعبولة تفهمه الاسلوب الجديد اللي رتبته مع والدتها و طبعا مكنش منه الا

محروس: فلوس ..فلوس تاني..حسبي الله و نعم الوكيل فيكي انتي و امك في ساعة واحدة انتوا عايزين تموتوني

كعبولة: ده حل مؤقت لحد منلاقي حل تاني

محروس : لا حل تاني ولا تالت مايا متجيش انا مش أد خراب البيوت ده

كعبولة: بقولك ايه ..انا مش قد الشغل والبيت بالشكل ده مهو يتقعدني من الشغل و اتفرغ لبيتك و عيالك يا تساعدني شوية و تسيبك من عدم المبالاه اللي انت فيها دي

محروس: يعني هو تهديد يا هانم طيب مش حتيسيبي الشغل و مش حساعدك و كمان حروح ابات عند امي و ابقي خلي سواق مامي اللي حيجيب مايا الصبح يوديكي الشغل..سلام

كعبولة:اهيء اهيء آآآآآآآآآآآآآآآآآآآآآآآآآآآآآآآآآآآآ

فاصل و نعوووووووووووود

عن اتفاقية التعاون المشترك

طبعا حضراتكم تعرفه المثل اللي بيقول الاوفة ام ودنين تشيلها مراتك بأديها الاتنين

و الايد لوحدها متسقفش بس ممكن تخبط علي الباب او تتهبد في الحيطة

هي دي بقي حضراتكم نظريات التعاون المشترك

يحكي ان في زمان قريب فتاة لطيفة تدعي كعبولة حلمت بان يخطفها علي حصانه الابيض فارس الاحلام ذو القلب الشجاع يجعلها ملكة في قصره تشير باصبها لشيء قيأتيها في الحال

تتنزه طوال اليوم في حديقة قصرها تلهو و تلعب و لا تتحمل اعباء سوي اعباء زوجها الحاكم من اجل ان تخفف عنه الالم ..تكون هي زوجته و حبيبته و مؤنسة وحدته و يكون هو لها الصدر الحنون لا يجعل الالم يمسها من قريب او بعيد يكون لها الملاذ من مصائب الحياة

يأخذها لشاطيء المملكة تلهو و تلعب و تملأ حياته فرحة و هناء تلاطم الامواج و تلاطمها و تركب امامه علي الحصانه و الموج يلاطم حوافره و لا يلحقها من التلاطم سوي الرذاذ

تداعب نسمات الهواء وجهها فيضع يدعه كي يمنع هذه النسمات خوفا من ان تؤذي هذه النسمات وجنتيها تنظر له فتهديه ابتسامة رقيقة تجعل قلبه يهوي بين يديها تحرسه في علبة قطيفة و تخفيه داخل خزانة قلبها ياله من فارس و يا له من ملك ..ملك قلبها و ملكت قلبه

كعبووووووووووووووووووووووووووولااااااااااااة

ان تلك اللحظات هي....

كعبوووووووولة اصحي يا ولية حنتأخر علي الشغل

كعبولة؟: همم

محروس: همم ايه يا يت انتي بقول حنتأخر علي الشغغغغغغغغغغل ده انتي لو كنتي نايمة في قبر كان زمانك قمتي يلا يا ولية مفيش وقت

كعبولة في راسها: و ليه؟ اه هو ده الفارس اللي انا استنيته؟؟

محروس: انتي مبلمة كدة ليه يلاااااااااااااااااا حتأخر علي شغلي يا ست انتي

كعبولة: حاضر حاضر..بس متزقش كدة

كعبولة: يا فتاح يا عليم يا رزاق يا كريم علي الصبح

دخلت تغسل وشها و التاني بيزأر برة: يااااااالااااااااااااااااا ساعة بتغسلي وشك ارحميييييييينييييييي عايز افطر قبل مروح الشغل

كعبولة في سرها: صبرني يا رب

و خرجت من الحمام و قالت: حاضر ثواني ويكون الاكل جاهز بس اهدي شوية

محروس: يلااااااااااااااااااا

تدخل تحضر الفطار و الشاي و تلبس و تلبس الاولاد كله في وقت واحد و المطلوب ان كل ده يخلص في 5 دقايق و طبعا الشعلة اللي تحت محروس مبتهداش فبيفضل يغلي طول الوقت: يلا..يلا..يلاااااااااااااااااا..حرام عليكي..حترفد من الشغل بسببك..كان يوم ميعلم بيه الا ربما يوم متجوزت..ولا يوم من ايامك يا امي

كعبولة في سرها: ياخدك انت و هي في ساعة واحدة

تشيل الاولاد و شنطتتهم و شنطتها و حضرته واقف علي باب الشقة: يلاااااااااااااااااااااااا

تنزل من البيت و شايلة ده كله علي قلبها و طبعا خطوتها تقيلة و بطيئة و هو واقف بيسخن العربية و الشعلة يا عيني مبتهداش: يلااااااااااااااااا

تركب الاولاد في المكان المخصص ليهم في الكنبة الخلفية و تدخل تقعد جنبه و تبتدي تعمل تمرينات النفس قبل متاخد دش الصباح

محروس: ياربي ايه ده متجوز سلحفة بطيء بطيء بطيء فيه ايه هو انتي اول ست تخلف توأم ما ياما ستات جابوا لا سمعنا جوازهم بيصرخوا ولا قارفين جوازهم في عيشتهم زيك..فينك يا امي ربيتي 6 عيال ده انتي بطلة و الله يا امي انتي ليكي الجنة و بجد الجنة تحت رجلك فعلا ده انا لو عشت طول عمري اوفي جمايلك مش حقضيها

كعبولة باصة قدامها كاتمة نفسها علشان ماية الدش متدخلش في جهازها التنفسي

محروس: مش تحمدي ربنا اني واقفت انك تودي عيالك عن البت الفافي اللي هزئت امي..حسك عينك تقوليلي احمد ربنا انها اخدت نص اللي كانت حتاخده مننا الحضانة ..انا كان عندي استعداد ادفع اضعاف مضاعفة في الحضانة ولا انهاش تاخد عيالي تربيهم علي المياصة و الدلع لو مكنتش امك اتحايلت عليا مكنتش وديتهم و لو مكنتش امي ست كبيرة كنت وديتهم عندها بس اقول ايه بقي نصيب و ان كانلك عند مايا حاجة قولها يا ست هانم

وصلوا بيت والدتها و مايا كانت مستنياهم تحت البيت علشان تاخد الاولاد وقفت العربية فنزلت كعبولة جري تجيب العيال تديهم لمايا

مايا: هاي كعبولة..وات هابند ..مال لونك مخطوف كدة ليه

مردتش عليها كعبولة عطيتها العيال وشاورت لها بايديها سلام و رجعت قعدت جنبه و طبعا مردتش عليها و لا قاردة تتنفس علشان تكمل بقيت الدش

محروس: بقولك ايه ..افردي وشك علي الصبح انا مبحبش النكد الصباحي بتاعك ده حضرتك لسة راجعة من اجازة وضع و المفروض انك سعيدة انك خلفتي توأم و حسك عينك حد يقولك فين الحلاوة ولا تعزميهم علي حاجة احنا ماشيين بالعافية انا بقولك ايه..بدل مقلبلك يومك نكد النهاردة..يا سااااااااااتر انتي ايه مش قادرة حتي تفردي وشك يا هانم ..ياربييييي غلطة عمري يا ناس غلطة عمري

يوصلوا الشغل تنط كعبولة من العربية تجري و تصدر تنهيدة قوية ..اخيرا اتنفست ..حمام الهنا يا كعبولة..ايوة يا حماعة مهي بقالها اكتر من ساعة الا ربع و هي بتاخد الدش الصباحي بتاعها

ترسم علي وشها ابتسامة و تدخل الشغل و هي طبعا اكيد سعيدة و عمالة تقرأ كل القرآن اللي حفظاه علشان متتحسدش وهي مخلفة اتنين ولو يعرفوا سهر الليالي اللي عايشة فيه اكيد حيحسدوا نفسهم و ساعتها حتيجي معاهم بالعكس فيتجوزا ربنا يفك عقدة كل اللي لسة متجوزوش و يتجوزوا علشان يتعفدوا اكتر و يحمدوا ربنا علي فترة الفراغ العاطفي اللي قضوها

المكتب بقي عند كعبولة كله ستات و بنات ماعدا المدير راجل بس راجل ايه لا تقولي محروس ولا بتاع ده بتصل بمراته يوميا يقولها بحبك و الستات المتجوزين يبصوله و يتنهدوا و بيقوله انه بيديهم امل في جوازهم يمكن يكونوا كدة في يوم من الايام و البنات تبصله و تتنهد و يقوله يمكن ربنا يرزقهم بواحد زيه في يوم من الايام

اما عن الفريق النسائي في المكتب فده منقسم قسمين 4 ستات متزوجات (و من ضمنهم كعبولة) و 4مش متزوجات

و الفريقين بينهم حقد طبقي واضح

المتزوجات يبصوا للمش ويتحسروا علي ايام زمان و يدعوا ان ربنا ياخد جوازهم علشان يرجعوا لعيشة الحرية

و اللي مش يبوصلهم ويقوله يا بختهم لقوا اللي يقبل بيهم و يتحمل مسؤليتهم(ده علي اساس انهم بيتحملوا مسؤلية نفسهم الاول)

فيما عدا الحقد الطبقي الواضح بين الفريقين: فكلهم اصدقاء خصوصا انهم تقريبا من سن واحد و من طبقة اجتماعية واحدة و ده اللي كان مخلي مكتبهم افضل مكتب في الشركة كلها و الوحيدين اللي متسمعش صوتهم طول الوقت بس احنا مش حنتكلم عنهم دولقتي

لأن كعبولة لقت ان الحل الوحيد علشان تهرب من العزومات بشكل لطيف انها تدعي التعب و تاخد اذن و تروح و تطوعت مدام سوكة انها توصلها البيت

مدام سوكة مين؟

احدي فريق الزواج في المكتب

ثم..

لالا بصوا انا مشغولة دلوقتي اكلملكم اتفاقية التعاون المشترك دي بعدين

فاصل ونعووووووووووود

امري لله........

امري لله

حلس ملس اصدي حلس و حلسة اعمل ايه يعني اتبري منهم؟؟؟؟

سوسو: ايوة كدة يا كعبولة استهدي بالله احنا مصدقنا انك هديتي ثم النرفزة بالشكل ده مش كويس علي الرضاعة ربنا يهديكي يا حبيبتي

كعبولة: اهيء اهيء منك لله يا محروس

سوسو: بس ياختي بس و الله حاسة بيكي بس تقولي ايه جهاز الاحساس عند الرجالة معطل .سد يا حبيبتي سد

باكينام هانم: كان مستخبيلنا فين ده كله و ارجع و اقول انتي السبب انتي اللي عملتي كدة في نفسك

كعبولة و هي مقطعة نفسها من العياط: بس يا ماما كفاية بدل مرمي نفسي من الشباك دلوقتي

سوسو: معلش يا ابلتي استهدي بالله احنا مصدقنا هديناها

باكينام هانم:ابلتي!!!!

وفي دماغها: هو الراجل ملحوس ده كل اللي حوال بيئة حتي جيرانه يخرب بيتك يا مهروس

كعبولة : اقول ايه لزمايلي في الشغل .اوري وشي للناس ازاااااااااي..يخرب بيتك يا متعوس

*******************************************

دخلت كعبولة شقتها و شايلة حلسة علي دراعها و ابنها علي دراع الست سوسو و البواب شايل شنطة هدومها اما باكينام هانم شايلة شنطة ايدها بس (بصراحة كتر خيرها طيب كويس انها قدرت تشيل شنطة ايدها من باب الرياضة اليومية برده)

بصت كعبولة علي البيت المقلوب حاله (طبعا مهي بقالها اسبوع محجوزة في المستشفي فرصة ذهبية لمفعوص انه يمارس هواية الكركبة المنزلية) كبايات في كل حتة و قميص متكوم هنا و شراب يقرغ مرمي هناك ..بصت كعبولة كدة و كانت علي وشك العياط و الانهيار مرة اخري

باكينام هانم: اهدي اهدي ..مايا جاية كمان شوية تنظفلك

سوسو: مايا دي تبقي مين؟؟؟

كعبولة : دي الهاوس كيبر بتاعت مامة

سوسو: هه؟؟؟ هوس ايه؟

كعبولة: مدبرة المنزل..زي كدة ريسة علي الخدم في البيت

سوسو:كمان ريسة

و تمصمص و تقول: حكم..

بعد 10 دقايق دخلت بنت شيك اوي لوحت بايدها كعبولة : هاي كي..هاو ار يو

سوسو: اهلا و سهلا يا حبيبتي البيت بيتك اتفضلي تشربي شاي و لا قهوة معلش لسة مجبناش الموغات و الشربات

الست: dont worry i got it

سوسو: انتي ياختي بقي تقربي ايه لكعبولة

الست: مي..نو. نو .نو..انا موش اقربلها انا مايا

سوسو: الهوس كوبر

مايا: ياا..الهاوس كيبر

سوسو: يا نهار مدوحس..دي ريسة الخدم عندكم يا كعبولة ..امال قرايبكم شكلهم ايه؟؟دي انظف من حماتك

كعبولة: يا ست سوسو.. بواب عمارتنا نفسه انظف من حماتي ..ارجوكي متجرحيش مايا بكلامك عن حماتي

مايا: يس..ذيس رابيش وومن

سوسو: ياختي انتي بتقولي ايه انا مش فاهمة حاجة

مايا: ارجوكي يا مدام..مش تتكلمي عن الست الفارجر دي..دي أن بليفابل

سوسو: يووووووووه ولا والله منا فاهمة حاجة

كعبولة: عديها دلوقتي و حفهمك بعدين

سوسو: ماشي يا كعبولة

كعبول: مايا انا حدخل اوضتي لحد متخلصي

مايا: اوكي..بس انا مش حقدر اقعد معاك كتير ..هم بس ساعتنين علشان خطيبي حيعدي عليا و نروح الكافيه

كعبولة: اوكي يا مايا

سوسو:كافيه!!!!!!!!!!

********************************************

جوة اوضة كعبولة..

سوسو: لا يا ست كعبولة..فهميني بقي ايه حكاية الست مايا دي

كعبولة : لا حكاية ولا حاجة

سوسو: يا بنتي دي شكلها بنت ناس اوي

كعبولة : بنت ناس اه بس لاسعة شوية

سوسو: ازاي يعني فهميني

كعبولة: بصي يا ستي ..مايا دي تبقي بنت صاحبة ماما

سوسو: ياعيني تلاقيهم اتفقروا يا حبة عيني و علشان كدة اشتغلت خدامه

كعبولة: اولا دي مش خدامة دي هاوس كيبر ..يعني مدبرة منزل و دي شغلها بيبقي اشرافي معظم الوقت مش بتشتغل بايدها كتير في البيت ثانيا اهلها متفقروش ولا حاجة ..ثم دي طالبة لسة في الجامعة

سوسو: لالالالا انا مش فاهمة حاجة..واحدة واخدة عليا كدة و فهميني

كعبولة: شوفي يا ستي

سوسو: ها

كعبولة: بقي يا سوسو مايا دي طول عمرها في مدارس اجنبي و متلحوس دماغها بحاجة اسمها الفكر الامريكي و الامريكان ستايل و الامريكان لايف..مبتتفرجش الا علي الانجليزي و مبتفكرش الا بالانجليزي و المراهقين يا ستي في امريكا بينزلوا سوق العمل من الصغر في مهن بسيطة يعني اللي يشتغل بياع جرايد و اللي تشتغل جليسة اطفال و كدة يعني فمايا قررت تبقي زيهم بس باسلوبها يعني و هي في اولي ثاتوي مثلا كانت بتجب حاجات من اللي الشباب بالجملة و تبعيها قطاعي زي الاستيكرز و الكروت و الدباديب و الحاجات دي و طبعا لما مديرة المدرسة اكتشفت اللي بيحصل ده و التجارة المدارة في المدرسة مسكتها عاقبتها و كانت حترفدها فابتدت مايا تفكر في اتجاه تاني و راحت اشتغلت في محل وجبات سريعة بس طبعا لصغر سنها و دلعها الزايد خصوصا انها بنت ناس زيادة عن اللزوم بوظت حاجات كتير و طبعا اترفدت ..بس مش مايا اللي توقفها حاجات زي دي ..عملت في فيلتهم حضانة خاصة و كانت هي المشرفة عليها هي و الدادات بتوعها و طبعا كل الاطفال اللي كانوا بيجولها كانوا من ابناء اصدقاءهم و معارفهم و اخوات صاحبتها في المدرسة علشان متبقاش حاجة محتاجة تسجيل و الحاجات دي ووسط ده كله اكتشفت مايا ان دراية و علمها كانثي ضعيف جدا و خصوصا لما انشئت الحضانة و اكتشفت انها لو اتجوزت شاب من ابناء طبقتها بتوع مامي و بابي حيتفقروا بعد مدة قصيرة بعد ميصرف كل فلوس بابي ومامي و ووسط قلة فرص العمل و كمان لو اتجوزت واحد مكافح يبقي حتبقي شبهي كدة كعبولة مع الفقر و البهدلة و طلوع العين فقررت انها تبني مستقبلها بنفسها بس المرة دي بطريقة مصرية امريكية اولا هي كان حلمها تدخل الالسن انجليزي بس غيرته الي كلية مش عارفة اسمها ايه كدة بس للاقتصاد المنزلي علشان لمت تبقي ست بيت تبقي ست بيت عن حق و دراسة و طبعا و هي دلوقتي في سنة تالتة بس مايا كمان مضيعتش وقت خلت والدتي تستغني عن فكرة الشغالة الفلبينية و تستخدمها هي علشان تطبق اللي درسته عملي و بتديها مرتب اوفر من مرتب الفلبينية ب 200 جنيه بس برده بالنسية لهنا مرتب كبير مش صغير و عاملة مشروع هي و زميلاتها في الكلية للتريكو و الكروشيه و المشروع بيكبر شوية بشوية ووسط ده كله قابلت فتي احلامها محسن..طالب في كلية تربية رياضية بس زيها مبيضعيش وقته و معتمد علي نفسه مش علي اهله و بعد مكان كول عمره بطل في الجودو او التايكوندو او الكاراتيه مش فاكرة بصراحة هي رياضة عنيفة و خلاص شغال دلوقتي مساعد مدرب في نادي كبير في نفس الرياضة و كمان بيشتغل في بعض مراكز الشباب ده غير انه بيحلم يأسس جيم كبير لما يتخرج و عايزه يكون فيه كل الآلات الحديثة و عجبته مايا بفكرها التقدمي و كمان بيساعدها في اللي بتعمله و بيشجعها و علي فكرة الاتنين بيحوشوا علي يعملوا الجيم الكبير ده و هي كمان بتحلم بمدرسة لربات البيوت و مصنع ملابس....آآآآآآآآدي يا ستي كل الحكاية

سوسو: يااااااه ده الدنيا دي فيها حاجات عجيبه ..بس غريبة اوي انها متعملش الهوس كوبر ده في بيتها و غريبة برده ان مامتها توافق انها تشتغل كدة

كعبولة: اولا مايا محدش يقدر يقف امام رغبتها و طموحها في اي شيء كمان قالت لو مارسته في بيتها الكل حيحاول يريحها وهي مش عايزة كدة هي عايزة حد يحاسبها علي اللي هي بتعمله ثانيا والدتي تبقي انتيمة والدتها وولدتها قالت انها عند مامي احسن ما تفضحها برة

سوسو: جدهة البت مايا اوي

كعبولة : اوي..علي الاقل ضمنت انها مش حتخيب خيبتي

سوسو: طيب و دي ايه حكايتها مع حماتك

كعبولة: يا ستي حماتي اول مرة تزرونا في بيت ماما حبت تتأنعر عليها و تفهملها انها احسن منها ولما والدتي قامت تدافع عنها هزأتها حماتي و قلت أدبها قامت مايا راحت دالقة عليها الشوربة السخنة و طلعت تجري برة البيت قبل مطولها و من ساعتها مشافوش بعض حقنا للدماء

سوسو: صحيح ..يعني هي حتيجي علي مايا اللي مش حتنكوي بنارها..بس فين سبع البرومبة بتاعك

كعبولة: من ساعة الانهيار اللي جالي في المستشفي مشوفتش خلقته .و الدكتور قالي انه قاله مشوفوش الا في البيت علشان اعصابي

سوسو و هي بتضحك: ريح برده

و فجأة سمعوا صريخ مايا برة

سوسو : ايه في ايه

كعبولة : قومي نلحقها نشوف مالها

خرجت كعبولة و تلاقي مايا بتصرخ في مأروس و بتقوله: انت يا استاذ انت حاسب مش كدة انا مهدودة في البيت و انت تيجي تبهدلي الدنيا كدة في حاجة اسمها تسمح رجلك قبل متدخل من باب الروف انا حطاها بنفسي مش تيجي تبهدلي اللي عملته و تعبت فيه

محروس ببله : بقولك ايه ده بيتي انا اعمل فيه اللي يريحني

مايا بصريخ: مش ممكن كان فين مخها كوكي و هي بتتجوز رابش زيك

كعبولة بعياط: كان مسافر يا مايا

مايا: هو مين ده

كعبولة : مخي

محروس: بقي هي دي مايا اللي بهدلت امي

مايا بتعال : يس ..بس اشوفها تاني و ابهدلهالك تاني

محروس و كان عغلي وشك الانفجار و حيغلط فيها الا ان كعبولة لحقته : يعني مسألتش علي ملس و ملسة

محروس و كأنه كان ناسيهم وافتكرهم فجأة : حلس و حلسة اولادي هم فين؟؟؟؟

كعبولة : عندك في الاوضة لي ادخل شوفهم بشويش علشان ميصحوش

نسي محروس مايا و طلع يجري يشوف ولاده صحيح هو مليان بلاوي بس لأول مرة من يوم متجوزا تكتشف كعبولة انه بيحب الاطفال و خصوصا ولاده و دي طبعا ميزة رهيبة وسط مستنفع العيوب اللي ماليه

اتنهدت مايا وقالت: غريب بجد ربنا يعينك يا كعبولة

كعبولة: عندك حق ..امال فين ماما يا مايا

شاورت مايا علي حتة في اخر الروف و قالتها : اهه

راحت كعبولة علي امها ولاقتها ماسكة سجارة و سرحانة خالص

كعبولة: مالك يا ماما؟

بصطلها امها بسرحان: وقالتها شوفي يا كعبولة عايز اقولك علي كلام يمكن يكون غريب انه يطلع مني بس لازم اقوله

كعبولة بجدية: خير يا ماما

باكينام هانم: شوفي انا عايزاكي تمسكي اعصابك شوية مع جوزك..طالما اتجوزتيه يبقي امرنا لله حنعمل ايه ..حاولي انقاذ بقي ما يمكن انقاذه..اوعي تغلطي غلطتي و تدوري علي الطلاق..بالنسبة لك حيكون راحة بس بالنسبة لأولادك حتبقي اعاقة

كعبولة باتستغراب: اعاقة؟؟؟؟

باكينام: ايوة..اوعي تفتكري اني مكنتش بحس بيكي و انت بتعيطي طول الليل محتاجة والدك ..ولا نظرتك لابهات صحباتك اللي كان كلها حسرة ..اوعي تفتكريني مكنتش حاسة بيكي ..انا كنت عارفة كل حاجة و كنت بحاول اعوضك علي اد مقدر..لكن برده مقدرتش اديكي كل حاجة

كعبولة وهي بتحضنها: بالعكس يا امي كنتي احسن ام في الدنياو...

باكينام: لكن مقدرتش اعوضك الحرمان العاطفي اللي لعب عليه جوزك و خطف قلبك بيه و لغالك عقلك..انا السبب في كل اللي بيجرالك ده

كعبولة و هي بتعيط : يمكن يا امي تكون نفسيتي تعبت بس ده مش معناه انك قصرتي في حقي بالعكس..لكن هو نصيب مش اكتر

باكينام هانم: انتي عارفة ..جوزك ده رغم كل العيوب اللي فيه الا انه طيب اوي ..تصوري؟؟ الدكتور قالي انه كان عايز يعملك عملية تجميل بعد الولادة علشان نفسيتك متتعبش((يا عيني الدكتور ضحك عليها..آآآه لو تعرف الحقيقة)

كعبولة: بجد يا مامي بجد؟

باكينام : ايوة..يمكن الراجل ده فيه حاحات كويسة لسة مكتشفتيهاش حاولي تكتشفيها يا كعبولة خصوصا ان بينكم رابط قوي دلوقتي

كعبولة حاضر يا مامي

اهيء اهيء

لفت كعبولة و مامتها لقوا الست سوسو بتعيط

كعبولة: خير يا سوسو مالك؟؟

سوسو: اصل الكلام اللي قالته والدتك يقطع القلب

بصوا لبعض باستغراب و كأن كل واحدة بتقول ايه ده هي كانت واقفة تسمعنا؟؟؟

كعبولة: انتي واقفة هنا من امتي؟؟؟؟

سوسو: من ساعة راحة و اعاقة اهيء اهيء

كعبولة و هي بتضحك : خلاص يا ست سوسو متعيطيش انتهي فاصل النكد

وااااااااااااااااااااااااااااااء

كعبولة طلعت تجري علي صوت العياط : طيييييب لما اوريك يا محروس مش قلتلك متصحيهمش صبرك عليا ليلتك طين الليلة دي

سوسو و مايا في نفس واحد: حتعمل ايه دي؟؟

باكينام بتضحك : حتروح تكتشف الخير اللي في جوزها

لحظات الولادة السعيدة او التعيسة متفرقش كتير...

معلش قبل مكلمكم عن لحظات الولادة احب اديكم نبذة سريعة عن الحمل ايه هو احساسك لما تكون مقروف من كل حاجة حواليك لا طايق اكل ولا شرب و لبس و بشر ولا اي حاجة كل حاجة في الدنيا بتسببلك اعياء شديد و ميل للقيء ده ان محصلش قيء بالفعل اسمع عن ستات مكنوش بيخرجوا من الحمام اصلا من كتر القيء و مبتعملش اكل لأنها مش قادرة تشوفه و طبعا مبتسلمش من كلام سبع البرومبة بتاعها و ان كل الستات حوامل و كلهم شايفين شغل بيتهم اشمعني انتي .....و من الاخر كدة متصدقوش مفيييييييش واحدة في العالم تقدر تشوف شغل بيتها خصوصا الاربع شهور الاولي من الحمل لأنها بجد بتكون مقرووووووووووفة من عيشتها و اللي عايشين معاها و اللي بتشوفهم كلهم في ساعة واحدة

طيب بلاش الاربع شهور الاولي ندخل علي الاربع شهور اللي بعدهم او الخمسة ان مكنوش 3 شهور لو حب عيالها يطلعوا اولاد 7 و يتعوجوا علي الناس اللي ولاد تسعة

ايه يكون احساسم لو ربطوا في بطنك حجر وزنه 4 كيلو و في كل قدم من رجلينك حجرين تانييين كل واحد فيهم يزن 2 كيلو ها يا فالح حتقدر تتحرك من مكانك حتقدر تتنفس ما بالك بقي بالست اللي حاملة الحمل ده كله ان مكنش اكتر كمان و لازم تقوم بواجبات البيت كاملة منغير نقصان و الا تسمع كلام زي الرصاص و ياسلام سلم بقي لو الست دي بتشستغل كمان بتبقي عاملة بجد زي الجاموسة اللي مغميين عنينيها و بتلف تلف تلف لحد متدوخ و تقع و هي مش عارفة ليه

تصحي الصبح تحضر الفطار و الشاي للباشا (محدش يقولي بتحضر لنفسها..الست ممكن تستغني عن الاكل و الشرب في سبيل انها ترتاح 5 دقايق توفرهم تتعب فيهم لسعادة البيه) تنزل تشتغل و يطلع عينها في الشغل تتناقر مع ده و تتخانق مع ده و تفهم في ده و تعلم في ده و تروح البيت رجلها مش قادرة تشيلها خصوصا بعد متحولت لعربية نقل حمولة نص طن متحركة

و طبعا اول متدخل البيت تتفتحلها جعوووووووورة كبييرة ((فييييييين الاكل يا هانم انا شقيان و تعبان طول النهار و انتي مش حاسة بيا حراااااااام عليكي يعني اول مدخل البيت بدل ملاقيكي محضرة الاكل و متروشنة و مستنياني الاقي بتمثلي فيها المرض) طبعا ده علي اعتبار انها كانت عند الكوافير بتعمل باديكير ومانيكير و سشوار لا كان طالع عينها اكتر منه ولا حاجة

تقوم الست تسخن الاكل(مهي اكيد طابخاه من بالليل ده سلو المرأة العاملة) و تحط لسعادته و متصدق يخلص الاكل علشان تقوم تلم بسرعة و تغسل الاطباق و تحضر اكل لتاني يوم و تغسل الغسيل و تنشره و بعدها تلمه تكويه ده غير تنظيف الشقة للي مش حياخد اقل من 7 ساعات خصوصا لما دلوعة مامته يتنقل بين الغرف يكركب علي قد ميقدر علشان يخنقها زيادة ووسط الدربكة دي كلها تسمع جعووووووورة تانية (الشاااااااااااااااااااي فين الشاااااااااااي يا مدام) ده اكيد يقصد انها مدام واحد تاني

ترد عليه بكل براءة و تقوله : هو انت قلتلي حاجة و انا قلتلك لأ؟؟؟؟؟؟

هو: يا سلام يا هانم و هو من امتي انا مش بشرب شاي بعد الاكل ..الله يمسيكي بالخير يا ماما كانت تقوم قبل مخلص اكلي علشان قبل مقوم من علي السفرة تكون حطالي الشاي ..ولا يوم من ايامك يا امي

هي في دماغها : صبرني يارب

و قدامه: حاضر يا حبيبي من عيوني الاتنين

هو: بعد ايه يا هانم بعد ملطعتيني ده كله علشان اشرحلك امتي تحطيلي الشاي ..طب مش شارب انا رايح عند امي

هي بارتباك : طب ...طيب...

و متكلمش كلامها يكون لابس هدومه و في ثانية واحدة يكون خرج من باب الشقة وراح عند امه غريبة مع انه لما بتطلب حاجة لنفسها ولا بتقوله خرجني بياخد اكتر من 3 ساعات تحضير ااااااااااااااااه نصيب

و تعيش في دوامتها لوخدها لحد نص الليل ده لو لحقت تخلص كمان و تترمي علي السرير تعزف سيمفونية بتهوفن التاسعة

خخخخخخخخخخخخخخخخخخخخخخخخخخخخخخخخخخخخخخخخخخ

خخخخخخخخخخخخخخخخخخخخخخخخخخخخخخخخخخخخخخخخخخ

تخيلوا علي مدي تسع شهور كل البلاوي دي الست بتشوفها و علي فكرة كل ده بتتحملوا بصدر رحب جدا مش حبا في جوزها بس حبا في الكائن الجديد اللي حيشرف البيت قريب و تقعد تحلم و تحلم و تحلم حأكله ايه حلبسه ايه حدخله مدرسة ايه و كلية ايه و شكل عروسته

ايوة محدش يبصلي كدة ايوة بتفكر حتي في عروسته و شكلها و هي عجوزة و ابنها بيوطي يبوس ايدها و جايبلها هدية و يقولها ست الحبايب با حنانة انت

شوفتوا الجمال و تعيش الست في عالم الخيال اللي حيستمر لأكتر من 20 سنة لكن كل ده مع كعبولة اختلف خصوصا لما تحطمت احلامها علي صخرة ملحوس اصدي محروس و هولاكو كمان ازاي؟؟؟؟؟؟

تعااااااااالوا نشوف

***********************************************

بدأت كعبولة تفتح عينها ببطيء شديد مش حاسة بحاجة و زي متكون قطنة وقعت في جردل ماية خفيييييييفة خالص و كل اللي حواليها اصوات غريبة مش مفسرة منها اي حاجة خالص و شوية شوية ابتدت تسمع طراطيش كلام و تفسره واحدة واحدة

صوت غريب بيقول : اهيء اهيء بس تقوملي بنتي بالسلامة و الله لخرب بيتك يا مسوس اهيء اهيء

وصوت زئير يرج اركان الغرفة: نياااااااااااهو و هو كان عمل ايه يعني ده حقه المشروع

الصوت الغريب: و الله محفوتهالكم كان ايه اللي رماكي الرمية السودا دي

كعبولة ابتدت تفسر الاصوات و تفهم الحوار انه بين حماتها و مامتها و بعدين سمعت صوت جوزها بيقول بمنتهي السماجة: هيهيهي انا مش فاهم حدرتك زعلانة من ايه يا تنت ..طب ده حتي كوووووووووول خالص

مامتها: ده انت اللي كوووووووووووولد بيور انا عارفة جابتك من انهي ديب فريزر؟؟؟؟؟؟؟؟؟

كعبولة فتحت عينها و استرجعت شريط الذكريات في بيتها قبل ميغم عليها و ينقلوها المستشفي و اول حاجة عملتها صرخت جامد و قالت: يا ماااااااااااماااااااااااا ابعدي البني آدم ده عني مش طايقاه اهيء اهيء انا اتبهدلت خالص يا مامي

باكينام هانم: اهيء اهيء عارفة يا حبيبتي ..امال لو تعرفي المصيبة التانية اللي عملها

كعبولة و هي متوقعة كارثة : عمل ايه تاني يا ماما؟؟؟؟؟

باكينام: اهيء اهيء اهيء اهيء

كعبولة و قد هالها البكاء و علي وشك الانفجار: قوليييييييييليييييييييي فيه ايه يا ماما تاااااااانيييييييييييي

باكينام : اهيء سمي ولادك اسامي من ايام الملك خوفو

كعبولة مصعوقة: سماهم ايه؟؟؟؟؟؟؟

باكينام: حلس اهيء اهيء و حلسة

كعبولة بتبص بشرز لمحروس اللي ضحك ببلاهة شديدة و قالها: ده كان اقتراح مامي يا حبيبتي كانت عايزة تسميهم علي اسم ابوها الله يرحمه و انتي عارفاني ..هيهيهيهي..مقدرش ارفضلها طلب زي ده

كعبولة بتصرخ : آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآ

الدكتور دخل علي اثر صرخة كعبولة: ايه ناس فيه ايه

معبولة محدش هارف يسكتها:آآآآآآآآآآآآآآآآآآآآآآآآآآآآآآآآآآآ

الدكتور: يا ناس حدج يرد يقولي هو فيه ايه؟

كعبولة : آآآآآآآآآآآآآآآآآآآآآآآآآآآآآآآآآآآ

الدكتور بينادي علي ممرضة: يا زكية حقنة مهديء قوي بسررررررررررعة

كعبولة لسة بتصرخ: آآآآآآآآآآآآآآآآآآآآآآآآآآآآآآآآآآآآآآآآ

فاصل و نعوووووووووووووووود

حلس و حلسة

حلس و حلسة فلذات اكبادي

لكم ان تتخيلوا الفرق بينهم

هو نسخة طبق الاصل من ابوه شكله ناوي يسلك مسلك حماتي في الحياة(بس يارب محدش يدعي عليا لو كان بايدي كنت بعدته عن ابوه و حماتي بس اعمل اي)

انا حلسة حلستي فهي عجباني اوي طالعة لتيتة باكينام انيقة روشة طحن و كووووووووووووووووووووول ان صو كيوت

بيوتيفول

بس يارب متخيب خيبة باكينام و كعبولة و تلاقي لما تكبر بعد 20 سنة ان شاء الله واحد ابن حلال مش ابن هولاكو حفيد جانكيز خان

الحقيقة الاتنين دول ارتبطت بيهم قبل مشوفهم بس يوم مجبتهوهم اجاااااااااااااااركم الله

كان حتة يوم يتحط في التاريخ

كنت مهدودة و كالع عيني من تنظيف الشقة اصدي الأن رووووف جاردن بتاعي و كنت سعيدة جدا ان محموحتي حبيبي حيجي يلاقي الدنيا بتبرق خصوصا اني بقالي اكتر من شهر مش عارفة امد ايدي في اي حاجة بسبب طبعا آلام الحمل زودوا علي كدة صحتي الضعيفة لأن مرتبنا كان يدوووووووووب بيكفينا لا كنت بشوف دكتور ولا بجيب مقويات زي بقيت الحوامل لدرجة اني كنت خايفة في الاخر اولد علي ايد داية........ايه ايام

المهم

دخل سبع البرومبة من الباب تفحص و تمحص الأن روف جاردن ورفع حاجب من حواجبينه و قالي:خير هو حد جايلنا النهاردة

قلته :لأ ليه يا حبيبي

هو: امال اتشمللتي و نظفتي البيت كدة ليه..خير..مسلسل المياصة قرب علي الانتهاء؟؟؟

مياصة انا مياصة

انا: هي حصلت يا محروس انا غلطانة ..كان المفروض احدف حماتي بايد الهون لما قالت عليا الكلمة دي و لو ان ادبي و اخلاقي منعوني المرة اللي فاتت المرة دي مش حسكتلها مش كفاية انك سايبني محتاسة لوحدي مش عارفة اعمل حاجة و كمان حركتي بقت تقيلة و انت مش مقدر اهيء اهيء

هو: منا من يوم متجوزتك و حركتك تقيلة لو كانت امك علمتك الطبخ و شغل البيت مكنش ده بقي حالك

انا و قد اجتاحتني ثورة غضب: اولا اسمها مامتك امك دي عند الست والدتك مش عندي هنا

ثانيا: امي اعظم ست في الدنيا علي الاقل مخلصتش علي بابايا و سابته يشوف حاله بره وكفي الله المؤمنين القتال مش خدته لحم و موته عريان حتي منغير العظم و الدود مكنش لاقي حاجة ياكولها

محروس :هو انتي بتألسي علي امي طييييب لما اوريكي

انا :ايه ؟ حتعمل اييييييييييييييه يعني

بصلي من فوق لتحت وساب الروف

اهيء اهيء

ايه اللي جرالك يا محروستي مكنتش كدة قبل الجواز كنت قلبي كنت عقلي كنت بتسمعني و بتحتويني ايه اللي حصلك لو كنت اعرف انك مامتك بالشكل ده مكنتش اتجوزتك و فضلت بعدك عني بدل ما هي منغصة عيشتي كدة اهيء اهيء

فجأة اتفتح الباب افتكرته محروس مسحت دموعي بسرعة و عملت نفسي مفيش حاجة بس مطلعش محروس طلع الست سوسو جارتي اللي تحتيا

سوسو: ايه يا كيكو مالك ايه اللي حصلك؟؟؟؟؟ شكلك بتعيطي .عملك ايه ابن امه ده

انا: اهيء اهيء انتي عرفتي منين انه ابن امه اهيء اهيء

سوسو: يا حبيبتي اللي امه تشتم مراته قدامه ويسكلتها يبقي ابن امه و مطلع عين مراته .ده غير انه و هو نازل قابله سامح جوزي و التاني قعد يبرطم بكلام عن الستات اللي ملهاش رابط و انه رايح عند امه علشان يربيكي

انا : استني كدة ...لالا سمعيني تاني..قلتي اللي امه تشتم مراته ..هي شتمت امتي فيا قدامك

سوسو: ياختي اول زيارة ليكم بعد جوازكم لما قدمتلها شوكلاتة و مارونج لاسيه نزلت علي السلم و تشتم فيكي انتي و امك و تقول ان باكينام هانم معرفتش تربي المفروض تمسكي فيها تبات معاك و تطبخيلها كمان مش تضحكي عليها بشوية باصطا بايتة

انا مصعوقة: ايه باسطا دي؟ يعني ايه؟

سوسو: عيني عليكي يا بت الناس متعرفيش يعني ايه بصطا ..ييعني جاتو بس درجة تالتة من اللي بيحصطوه في علبة كارتون في افراح الشوادر

انا: يا نهارها مش فايت ده انا آآآآآآآآآآآآآآآآآآآآآآآى

سوسو مصعوقة: مالك يا حبيبتي

انا : ده انا حاخرب بيت آآآآآآآآآآآآآآآآي

سوسو: مالك مالك فيكي ايه

انا: ضهري آآآآآآآآآآآآآآآآآآآآآآآآآآآآ

سوسو: انتي بتولدي ولا ايه يا خرااااااااااااااااابيييييييييييي

انا و ماسكة ظهري: شكلي حول..آآآآآآآآآآآآآآآآآآآآآى

سوسو بتصرخ: الحقني يا ساااااااااااااااااااااااااامح

_______________________________________________

في المستشفي

الدكتور: ايه الجهل ده يعني ايه يا استاذ مدوتهاش لدكتور طول فترة الحمل ؟ ازاي مكنتوش بتابعوا حالتها كنت حتولدها ازاي حضرتك علي ايد داية؟؟؟

محروس: و الله يا دكتور كان نفسي بس جيرانه ربنا يسامحهم هم اللي جابوها هنا

الدكتور: جااااااااااااهل ..انت امثالك انقرضوا من زمان مراتك يا استاذ حامل في توأم و كان يلزمها متابعة و عناية اكثر من كدة حضرتك بالشكل ده كنت حتتسبب في موتها هي واولادك ...و احنا مضطرين دلوقتي نعملها قيصيرية

محروس بيلطم : يا نهاري كمان؟؟

الدكتور: ايوة كمان علشان تتربي و تبقي توديها لدكتور من اول الحمل مش ت...

محروس و هو بيصرخ: و مين قالك اني حخليها تخلف تاني مش كفاية خراب بيوت من جميع النواحي توأم و قيصرية لا الله يخليك كفاية عليا ..و يا ريت كمان لو فيها رزالة تشيلولها الرحم بالمرة اهو اضمن انها مش حتخلف تاني

الدكتور و هو بيشد شعره : حيوااااااااااااااان انت مكانك قفص الاسود ولا القرود..حسبي الله و نعم الوكيل

و دخل يجري علي اوضة العمليات

باكينام هانم جاية بتجري من اول المستشفي لآخرها و بتصرخ و تقول: اما خربت بيتك يا محروس ل....(ميصحش برده اقول اللي قالته بالحرف)

انت عايز تبهدلي بنتي يا فارجر يا بيئة ده انا محلتيش غيرها

و محروس طبعا دخل استخبي في اول اوضة قابلته مهو مش حمل دفع فلوس و عيلين و وواحدة تبهدله كمان

و هو مستخبي سمع صوت زئير ووحش بيصرخ في باكينام هانم ويقولها: نيااااااااااااو انتي بتشتمي في ابني نيااااهو انتي متعرفيش انا ممكن اعمل فيكي ايه

محروس مظأتت: امي جت امي جت هيييييييييه..ايوة كدة يااما يا هوكي و ريها الانياب

الا ان الدكتور خرج يصرخ في الكل

مش كدة يا ناس حرام عليكم محدش عارف يشتغل في المستشفي بسبببكم ايه في ايه و فين الاستاذ حلمووووس ده خليه يمضي علي اوراق المستشفي

هولاكو: حلموس ايه يا حلموس اسمه محروس محروووووووووس

الدكتور: محروس حلموس متعوس هو انا حتجوزه فييييييين هو الست مراته بتموت لازم نعملها العملية حالا

محروس اتصعق من الكلام و اضطر آسفا يخرجلهم علشان يلحق كعبولة صحيح انه ندم انه اتجوزها و ان بالنسبة له(محلاها عيشة الحرية) بس موت لالالا هو مش ندل للدرجة هو اقل من كدة بدرجتين بس

محروس: انا اهو يا دكتور هات الورق امضي عليه و ياريت تفكر في موضوع العميلة التانية اللي قلتلك عليها

الدكتور عطاله الورق يمضي و عينيه بتطق شرار : لا مفيش خدي امضي علي ده بس

باكينام هانم: عملية ايه؟

الدكتور: اصله عايز يعمل لبنتك عملية..............

فووووووووووووو

طار محروس من قدام الكل قبل ما باكينام هانم تعرف كان حيعمل في بتها ايه

فا صل و نعووووووووووووود

مامتشي

مين دي؟

مامتشي

باكينام هانم عزالدين عزيز ابو العز

سيدة من الطبقة الراقية (الراقية اوي) قررت تتنازل عن مستواها الاجتماعي و تتجوز واحد (فارجر)زيي كدة و كانت النتيجة

انا طبعا كعبولة

و كرهها لجمييييييييييييييييييع الرجال و ده شيء طبيعي بعد ما الندل(اصدي والدي يعني مع الاحتفاظ بالالقاب) تخلي عني و عنها وقرر الزواج باحدي ساقطات المجتمع(علي حد قولها)

طبعا نتيجة طبيعية جدا لكل واحدة تتجوز واحد بيئية خصوصا انها نضقته و هيأته و حمته و لبسته اللي عمره مكان يحلم بيه و عايشته في فيلا 3 ادوار (الله يرحم ايام مكنش لاقي سرير ينام عليه.برده علي حد قولها) و بعد مخلته نجم من نجوم المجتمع الراقي عطاها استمارة 6

اييييه دنيا

شوفوا هو انا علي أد ما اتذكر من ابويا كان شبه كدة محروس جوزي ازاي؟(توووووووووووووت توووووووووووت تش تش تش تش) افهموها بقي بس مكنش يجرؤ يخلي ماما تشوفه و الا كان اخد باللي في رجلها طبعا لأنه بيحب السجائر المحلي و مامتشي كانت بتجبره يشرب مستود او سيجار و طبعا هو ملوش في النظافة(برده علي حد قولها) علي عكس محموحتي اللي ميصدق ماما تشتريله مستور علشان تنظفه ياخدها و يقولها(ميرسي يا تنت ربنا يخليكي ليا)..بيئة بيئة اوي يعني

لكن وسط ده كله منكرش انها ربتني كويس و عطيتني نصايح غالية كان لازم استثمرها كويس لولا مراية الحب المعتوهة بتاعتي

و النصايح تتلخص في

قصصي ريش طيرك قبل مليوف علي غيرك(و لو انه مثل بيئة اوي و مش المفروض يصدر من باكينام هانم بس يلا ماشي الحال)

متستنيش لما يدبحلك القطة ادبحيها انتي الاول(و يا ليتني فعلتها اهو دبحها قبلي و ياعيني لسة دمها سايح علي الارض)

يا مآمنة للرجال يا مأمنة للماية في الغربال(وده شيء طبيعي ممن اعطاها جوزها صابونة)

و خليكي ست البيت و راجله(و دي بقي مش فاهماها لحد دلوقتي يعني المفروض اني البس فستان الصبح و احط شنب بعد الظهر ولا ايه بالظبط لو حد فاهم يفهمني يا ناس)

طبعا مامي مش بتزورني خالص انا دايما اللي بروحلها آكل اللحمة و الفراخ عندها(مش قلنا بنوفر تمنهم من اجل التووووووووت توووووووت)

و اكيد مستواها ميسمحلهاش انها تطلع الدور التاسع علي رجليها و تقعد في (أن- روف جاردن) اللي هي شقتي..سوري..اصدي سطوحي

و طبعا كل مشوفها مبتنساش تسم بدني بكلمتين علي منوال

ياواخد القرد علي ماله يروح المال و يفضل القرد علي حاله و يا واخد القرد منغير مال تبقي كارثة في وش العيال

اصدها يعني ان العيال كمان بيطلعوا قرود و ده طبعا مصيبة خصوصا اني شايفة حلس ابتدي يبقي شبه ابوه بالظبط

حلس مين؟؟؟؟

اه نسيت اقولكم حلس ده يبقي ابني البكري

بس الحمدلله يا جماعة حلسة طالعة لأمها

حلسة مين؟؟؟ لالالا انتوا جايين تهزروا

حلسة طبعا اخت حلس التوأم متقولوش اني قلت حلس البكري بتاعي وده معناه انه اكبر منها منا عارفة مهو اكبر من حلسة ب 3 دقايق بحالهم

شوفتوا؟ علشان تعرفوا ان مدام كعبولة مش اي حاجة و يوم مخلفت جابت توأم و حلفت و متخلف تاني بعدها

ليه؟؟؟؟؟؟

لالالا مش علشان تنظيم الاسرة و الكلام الفارغ ده

ده لأسباب اخري احكيهالكم بعدين في وقت الفراغ

بس المكان ده فقط من اجل مدام باكينام هانم

ارجوكم خدوا بالكم منها علشان دورها جاي قريب

و لنا عودة مع حلس ة حلسة

تاااااابعوناااااااااااااااااااااا