كعبولة تتذكر...

متحسبوش يا بنات ان الجواز راحة
و متزعلوش يا بنات ان قلنا بصراحة
ان الجواز عمره عمره مكان راحة


بصت كعبولة علي الكاست و حطت ايدها علي خدها و قالت : كنت فين يا بشوات ياللي بتغنوا قبل مقع وقعتي السودا

و مهما نتعب نقوووووووووول تعب الحبيب راحة

شدت كعبولة في شعرها وقالت: حبيب حبه برص و عشرة خرص اه يانا يا ما يا ريتني سمعت كلامك قبل متهف في نفوخي و اتجوز ياريتني رفعت شعار لا للرجال زيك انا كان مالي و مال الهم ده ياناس

قامت كعبولة طفت الجهاز و طلعت برة تتهوي شوية
ياه دي الدنيا ظلمة اوي هي الساعة كام دلوقتي
ياه 2 و نص هو ده الوقت الوحيد اللي ممكن اتمتع فيه بهدوء
بقي دي اخريتها يا كعبولة فين ايام مكنتي وحيدة امك بعد ما الندل ابوكي سابكم واتجوز واحدة تانية و كانت امك طول الوقت في الشغل و انتي في البيت لوحدك تعلبي بده و تشيلي ده و تحطي ده لاحد يقولك بتعملي ايه ولا ليه؟
كنت بنت روشة طحن مثقفة و مطلعة و ليكي كتب و قرآت كثيرة في الموضة و الميك-آب و مكتبتك مليانة كتب عن كيفية المحافظة علي الرشاقة و الغذاء الصحي و جمال البشرة

ااااه ايام وعدت عالفاضي علي ايه حنبكي علي الماضي
اللي حصل حصل يا حبيبتي تقبلي الواقع و امرك لله
--------------------------------
افتكرت محروس جوزها اللي قابلته و هو بتقدم علي وظيفة في شركته و اللي سحرها بعيونه الدبلي اللي كانت ظاهرة من تحت النظارة قعر الكباية اللي لابسها و افتكرته لما مد ايده يسلم عليها يعرفها بنفسه
محروس سعيد
كعبولة: انا الاسعد
محروس: هههه لا لا ده اسمي محروس سعيد مهندس الكمبيوتر بالشركة
كعبولة: اهلا بك
محروس: المدام موظفة جديدة هنا في الشركة
كعبولة بـأنعرة كدابة: مدام.. انت شايفني مدام..لا حضرتك انا آنسة ..الآنسة كعبولة ..و لسة مبقتش موظفة انا لسة بقدم لوظيفة السكرتيرة
محروس: هاها..ده من حسن حظ الشركة يا فندم ..معتقدش انهم حيعملوا لحضرتك اختبار كفاية رقتك و ذوقك الواضحة علشان تتعيني..تشرفنا يا آنسة
كعبولة في دماغها: دمه خفيف المضروب
كعبولة: ممكن بقي تسيب ايدي علشان اروح
محروس بعد ان لفت انتباهه انه مازل ممسكا يدها: اه اسف ده كارتي يا آنسة اي وقت تحتاجي اي حاجة انا في الخدمة ..سلام
سلمت عليه و مشيت كعبولة و غي دماغها عيونه الدبلي اللي سحراها يااه ده شكله شاب لطيف اوي
--------------------------

اه شاب لطيف اوي مكنتش اعرف انه جردل كآبة بيور مستنيني علشان بنكب عليا لوحدي كان فين نافوخك يا هانم انت بتتسحري بقط الصحراء اللي انتي متجوزاه ده
رجعت تاني تعصف بيها الذكريات
--------------
محروس ماسك ايدها علي شط النيل
مكنتش فاكر اني حاحبك بالشكل ده حياتي منغيرك كانت ولا حاجة يا كعبولة
كعبولة و هي ماسكة دموعها: انت اللي بتقول الكلام ده..انا اللي حياتي مكنش ليها طعم منغيرك .. انك عوضتني عن حنان الاب اللي ضاع مني و حنان الاخ اللي عمره مكان عندي و عرفتني طعم الحب
محروس و عينه كلها دموع: حبنيلك قصر عالي.. واخطف نجم الليالي
-----------------
اه نجم عالي اهيء اهيء
بصت وراها علي شقتها..اصدي العشة اللي محشورين فيها
ايوة مهو ملهاش اسم غير عشة مهو مفيش حد يسكن السطوح الا الفراخ......و كعبولة
يمكن علشان كدة قالها قصر عالي و هي اللي مفهمتش؟؟؟؟
غالبا هو ده اللي قصده مهو محروس ده راجل حويط مش سهل خالص زي ماكانت فاكرة
و رجعت تاني لشريط الذكريات
------------------

محروس:انا حكون اسعد واحد في الدنيا يا تنت لو وافقتي علي جوزاي من كيكو
الام: كيكو !!! و كيكو دي مين ان شاء الله
محروس: كعبولة يا تنت اصل انا بدلعها و اقولها كيكو
الام: ااااااااه كعبولة كيكو
وحطط رجل علي رجل وقالته: ماشي يا بتاع كيكو عندك شقة ؟؟؟
محروس : طبعا يا تنت
الام: ممتاز..المهر عايزاه 20 الف جنيه..و الشبكة من اكبر جواهرجي في القاهرة و متقلش عن 20برده تكون خاتم سوليتر علشان الشياكة و طبعا العفش اللي من باريس و النجف اللي من ايطاليا ده شيء مفروغ منه
محروس بهبل شديد: هه..بتقولي ايه يا تنت صحيح انا راجل متيسر لكن مش للدرجة دي
الام: يعني ايه يا استاذ مش عاجبك طيب معنديش بنات للجواز.. اتفضل برة

*****
فاصل و نعود